उपचुनावमा माओवादीले खाता खोल्यो, पुथाउत्तरगंगा-२ वडाध्यक्षमा जगत घर्ती निर्विरोध

काठमाडौं । स्थानीय तहको उपनिर्वाचनमा रुकुम पूर्वबाट माओवादी केन्द्रले खाता खोलेको छ ।

कांग्रेस-एमालेको तर्फबाट उम्मेदवारी दिएका जीवन रोकाले उम्मेदवारी फिर्ता लिएपछि पुथाउत्तरगङ्गा गाउँपालिका-२ को वडाध्यक्षमा जगत घर्ती निर्विरोध भएका हुन् ।

वडाको विकास, समृद्धि र सामाजिक रुपान्तरणको काम सबै मिलेरमात्र सम्भव रहेको भन्दै जीवनले जगत पुरानो तथा सबैका अभिभावक भएको भन्दै राजीखुसीबाट समर्थन फिर्ता लिएको विज्ञप्तिमार्फत् जानकारी गराएका छन् ।

वडाध्यक्ष पदमा निर्विरोध निर्वाचित भएका घर्तीलाई अध्यक्ष पुष्पकमल दाहाल ‘प्रचण्ड’ ले बधाई दिएका छन् ।

उनले फेसबुकमा लेखेका छन्, ‘रुकुम (पूर्व) पुथाउत्तरगंगा गाउँपालिका वडा नं. २ को उप निर्वाचनमा वडा अध्यक्ष पदमा निर्विरोध निर्वाचित हुनुभएकोमा हाम्रो पार्टीका उम्मेदवार क. जगत घर्ती (काजु)लाई हार्दिक बधाई तथा कार्यकालको शुभकामना व्यक्त गर्दछु ।’

निर्वाचन आयोगले आधिकारिक घोषणा गर्न भने बाँकी रहेको छ ।