कीर्तिपुरको मेयरमा नेकपा एसको उम्मेदवारी निष्क्रिय, प्रदेश सांसदले भनिन्, ‘एकोहोरो नहाेस्’

काठमाडौं । मंसिर १६ मा हुने स्थानीय तह उपनिर्वाचनका लागि कीर्तिपुर नगरपालिकाको मेयरमा मनोनयन दिएका नेकपा एसका उम्मेदवार भानु रिजालको उम्मेदवारी निष्क्रिय भएको छ ।

पार्टी अध्यक्ष माधवकुमार नेपाल आफैंले बुधबार विज्ञप्ति जारी गरी रिजालको उम्मेदवारी निष्क्रिय भएको र माओवादी केन्द्रका उम्मेदवार प्रा.डा. शिवशरण महर्जनलाई सघाउने उल्लेख गरेका छन् । सोही नगरपालिकाको वडा नं. ४ को वडाध्यक्षमा भने नेकपा (एस) की उम्मेदवार रिता खड्काको उम्मेदवारी कायम रहने विज्ञप्तिमा उल्लेख छ ।

तर, उक्त वडामा माओवादी केन्द्रका तर्फबाट उम्मेदवारी दिने नारायण विष्टले उम्मेदवारी निष्क्रिय पार्ने, नपार्नेबारे केही भनेका छैनन् । पार्टीले पनि त्यसबारे केही भनेको छैन ।

एसको तर्फबाट कीर्तिपुरको निर्वाचन संयोजन गर्ने जिम्मेवारी पाएकी प्रदेश सांसद रमा आलेले वडाध्यक्षमा माओवादी केन्द्रले उम्मेदवारी निस्कृय नपारेसम्म मेयरको उम्मेदवारी एकोहोरो निष्क्रिय पार्नुको अर्थ नहुने बताइन् ।

‘माओवादीसँगको पूर्वसहमतिका आधारमा मेयरको उम्मेदवार निष्क्रिय पार्ने कुरा त ठीक छ, तर हामीले पाएको वडाध्यक्षमा उहाँहरु पछाडि हट्नुपर्छ’, उनले भनिन्, ‘नत्र एकोहोरो माया गरेर केही अर्थ छैन ।’