नेपालले पायो डबल बी माइनस ‘कन्ट्री रेटिङ’, यसले के दर्शाउँछ ?

काठमाडौं । नेपालले पहिलो पटक ‘कन्ट्री रेटिङ’ पाएको छ । अन्तर्राष्ट्रिय रेटिङ एजेन्सी फिचले नेपाललाई डबल बी माइनस ‘कन्ट्री रेटिङ’ दिएको हो ।

नेपाल सरकारले पहिलो पटक कन्ट्री रेटिङ गराएको हो । दक्षिण एसियाली मुलुकहरूमध्ये नेपालले राम्रो रेटिङ पाएको छ । राजनीतिमा अस्थिरता र चुनौतीका बीच नेपालले आर्थिक सुधारका लागि महत्त्वपूर्ण कदम चालेको भन्दै फिचले उक्त रेटिङ दिएको हो ।

नेपालले पाएको रेटिङ सोचेभन्दा राम्रो रहेको चार्टर्ड एकाउन्टेन्स संघका अध्यक्ष अरुण राउत बताउँछन् । उनी भन्छन्, ‘नेपालले पाइको रेटिङ सोचेभन्दा राम्रो हो । हामीले सीसम्म प्राप्त हुन्छ होला भनेर अनुमान गरिरहेका थियौँ । तर, डबल बी माइनस पायो ।’

उनका अनुसार रेटिङमा एएए प्राप्त भएमा सबैभन्दा राम्रो मानिन्छ । तर, नेपालले पाएको रेटिङ पनि अपेक्षाभन्दा राम्रो रहेको छ । यो रेटिङले नेपालमा लगानी गर्ने विषयमा फरक पार्छ ।

‘नेपालमा लगानीको वातावरण छैन भनेर जसरी हल्लाहरू फैलिरहेको थियो । यो कन्ट्री रेटिङले सकारात्मक सन्देश दिनेछ । अब कन्ट्री रेटिङ पाएपछि नेपालमा लगानी गर्न लगानीकर्ताहरू के हो के हो भनेर अलमलिनु परेन’, उनले नेपाल प्रेससँग भने ।

उनका अनुसार विदेशी कम्पनीहरूले नेपालमा लगानी गर्दा देशको रेटिङ कस्तो छ भनेर हेर्ने गर्छन् । यो नेपालले पाएको रेटिङको आधारमा अब नेपालमा लगानी गर्न चाहानेहरुलाई यहाँको अवस्था स्पष्ट पारेको छ ।

‘नेपालमा अहिले ग्रिन बण्डको कुरा आइरहेको छ । कुनै पनि कम्पनीले बण्डहरु जारी गर्यो भने प्रिमियम लगाउने भन्ने हुन्छ । यो जति धेरै रेटिङ कम भयो त्यति रिस्क भन्ने हुन्छ । सी या डी आएको थियो भने जारी नै गर्न मिल्दैन थियो । अहिले जुन पायो त्यसले कम्तीमा जारी गर्न मिल्ने भयो’, अध्यक्ष राउतले भने ।