कथा संग्रह ‘प्रच्छन्न इन्द्रिय’ बजारमा

काठमाडौं । लेखक तथा ज्यष्ठ नागरिक समाजका केन्द्रीय सदस्य शिवप्रसाद पाण्डेको पहिलो कथाकृति ‘प्रच्छन्न इन्द्रिय’ सार्वजनिक गरिएको छ ।

संघीय राजधानीमा शनिबार आयोजित एक कार्यक्रममा वरिष्ठ समालोचक प्रा.डा. लक्ष्मणप्रसाद गौतम, साहित्यकार डा. रवीन्द्र समीर, व्यंग्य लेखक लक्ष्मण गाम्नागे, समालोचक ज्ञानु अधिकारी तथा लेखक पाण्डेले पुस्तक संयुक्त रुपमा विमोचन गरेका हुन् ।

लेखक पाण्डेले पुस्तकमा आफ्नो समय र अनुभवअनुसारको समाज कथ्य रुपमा प्रस्तुत भएको बताए । उनका अनुसार हरेक कथाले सामाजिक परिवेशलाई चित्रण गरेको छ ।

साहित्यकार डा. रवीन्द्र समीरले ६८ वर्षको उमेरमा पहिलो कथा संग्रह निकालेर लेखकले सबैलाई प्रेरणा दिएको बताउँदै हरेक कथामा लेखकले आफूले सुनेको, देखेको, भोगेको तथा अध्ययन गरेको विषयलाई जनजिब्रोको भाषामा लेखेको चर्चा गरे ।

समीक्षक ज्ञानु अधिकारीले पाण्डेका कथामा अर्गानिक स्वाद रहेको तथा व्यंगात्मक चेत उत्कृष्ट रहेको बताइन् ।

पुस्तक मञ्जरी प्रकाशनले बजारमा ल्याएको हो । पुस्तकको मूल्य ३७५ रुपैयाँ रहेको छ ।