जरिवानाको अर्को पत्र लिएर बालेनका प्रतिनिधि च्यासलमा, एमालेले लिन मानेन (भिडिओ)

काठमाडौं । एमालेले शुक्रबार काठमाडौंमा आयोजना गरेको जागरण सभाका क्रममा दरबारमार्गमा फोहोर गरेको भन्दै काठमाडौं महानगरपालिकाले जरिवाना असुल्ने प्रयास जारी राखेको छ । आज महानगरको एक टोली एमाले पार्टी कार्यालयमा नै पुगेर पत्र दिन खोजे पनि एमालेले दर्ता गर्न मानेन ।

यसअघि दिएको पत्रमा एमालेले ‘रेस्पोन्स’ नगरेपछि बालेनले अर्को पत्र दिएर पठाएका हुन् । एमाले कार्यालयमा नगरप्रहरी सचिव महानगरका कर्मचारी पुगेका थिए । कार्यालयका कर्मचारीले यो विषय आफूहरूसँग असम्बन्धित भन्दै फर्काइदिएको स्रोतले बतायो ।

ती कर्मचारीको भनाइ उद्धृत गर्दै स्रोतले भन्यो, ‘छोराले गरेको काममा बाबु जवाफदेही हुँदैन । त्यो सभा काठमाडौं कमिटीले गरेको हो । पत्र दिने भए उतै दिनुस् ।’

कर्मचारीले दर्ता गर्न अस्वीकार गरेपछि महानगरका कर्मचारीले निराश हुँदै गोजीमा हालेका थिए ।