स्मिता दाहालले सार्वजनिक गरिन् प्रेमी, चाँडै लगनगाँठो कस्दै (तस्बिरहरू)

काठमाडौं । पूर्वप्रधानमन्त्री पुष्पकमल दाहाल ‘प्रचण्ड’ की नातिनी गायिका स्मिता दाहाल विवाह बन्धनमा बाँधिने भएकी छन् । उनले आफ्नो प्रेमीसँग आउँदो २१ गते लगनगाँठो कस्न लागेको पारिवारिक स्रोतले बताएको छ ।

स्मिताले श्रेष्ठ थरका युवासँग घरजम गर्न आँटेकी हुन् । हालैमात्र सामाजिक सञ्जालमार्फत उनले ‘प्रेमी’ सार्वजनिक गरेकी थिइन् । उनले सुरूमा साथी, त्यसपछि प्रेमी हुँदै अब सधैँका लागि आफ्नो हुन लागेको बताएकी छन् ।

स्मिताले अंग्रेजीमा लेखेको स्टाटसको भाव छ, ‘कलेजका सीटहरूबाट एक अर्कालाई चियाउनेदेखि सधैँका लागि एकअर्काको हात समाउने योजनासम्मको यो यात्रा हाँसो, राति अबेरसम्म कुराकानी र हामीले मात्र बुझ्न सक्ने मौनताले जेलिएको छ । मेरो साथी, त्यसपछि प्रेम र अहिले सधैँका लागि । मलाई संसारकै भाग्यमानी हृदय बनाइदिएकोमा धन्यवाद छ । म सधैँका लागि तिम्रो हुन आतुर छु ।’

स्मिता र उनका प्रेमी कलेजका सहपाठी हुन् । कलेज पढ्दादेखि नै उनीहरू प्रेममा थिए । श्रेष्ठ हाल स्नातकोत्तरको पढाइ सकेर पीएचडीको तयारीमा रहेका छन् । उनीहरूको ईंगेज्मेन्ट केही समयअगाडि भइसकेको पारिवारिक स्रोतले बताएको छ । उनीहरूले नर्लिङ रिसोर्टमा विवाह गर्न लागेका हुन् ।

स्मिता पूर्वप्रधानमन्त्री प्रचण्डकी कान्छी छोरी गंगाकी पहिलो श्रीमानतर्फकी छोरी हुन् । उनी सानैदेखि सांगीतिक क्षेत्रमा सक्रिय छिन् ।

‘मायालु तिमी कता छौ’ बोलको गीतले उनलाई निकै चर्चा दिलाएको थियो ।