भियतनामका कम्युनिष्ट नेतासँग एमाले महासचिव पोखरेलको भेट, दुई देशबीच सिधा हवाइ सेवा सञ्चालनमा जोड

काठमाडौं । नेपाल भ्रमणमा रहेको भियतनाम कम्युनिष्ट पार्टीको टोलीले नेकपा एमालेका महासचिव शंकर पोखरेलसँग भेट गरेको छ । भियतनाम कम्युनिष्ट पार्टीका वैकल्पिक केन्द्रीय सदस्य ली हाई बिन नेतृत्वको टोलीले मंगलबार महासचिव पोखरेलसँग भेट गरेको हो ।

६ सदस्यीय प्रतिनिधिमण्डलले एमाले केन्द्रीय कार्यालयमा पुगेर महासचिव पोखरेलसँग भेटी छलफल गरेको छ । भेटमा दुई देशका सरकार, कम्युनिष्ट पार्टी र जनताका बिचको सम्बन्धका बारेमा छलफल भएको छ ।

भेटमा एमाले महासचिव शंकर पोखरेले प्रधानमन्त्री तथा पार्टी अध्यक्ष केपी शर्मा ओलीले प्रधानमन्त्रीका रूपमा महत्वका साथ भियतनामको भ्रमण गरेबाट दुई देशबीचको गहिरो सम्बन्धलाई उजागर गर्ने बताए । पोखरेलले भियतनामसँगको सम्बन्धका विभिन्न पाटाहरूको चर्चा गर्दै बुद्ध धर्मले नेपाल र भियतनामलाई सांस्कृतिक रूपमा जोडेको बताए ।

पोखरेलले यो सम्बन्धलाई घनिष्ठ बनाउन दुई देशबीच सिधा हवाई सेवा सञ्चालन गर्न पहल हुनुपर्नेमा जोड दिए । उनले भियतनाममा भएको स्वाधीनता र स्वाभिमानको आन्दोलनबाट नेपालले ठुलो शिक्षा र प्रेरणा लिएको स्मरण गरे । भियतनामको आर्थिक विकासबाट नेपालको विकास र समृद्धि यात्रा अगाडि बढाउन सकारात्मक प्रभाव पर्ने पोखरेलले विश्वास व्यक्त गरे ।

भेटमा भियतनाम कम्युनिष्ट पार्टीका वैकल्पिक केन्द्रीय सदस्य लिले नेपालमा कम्युनिष्ट पार्टीले हासिल गरेको सफलताप्रति खुसी प्रकट गरे । उनले आगामी दिनमा अझ बढी सफलताको शुभकामना व्यक्त गरे ।

उनले दुई कम्युनिष्ट पार्टीबिचको सम्बन्धलाई सुदृढ बनाउँदै दुवै देश र जनताको आर्थिक समृद्धिका लागि आपसी सहयोग अभिवृद्धि गर्न भियतनाम तयार रहेको बताए ।