सातौं सामाजिक सुरक्षा दिवसको अवसरमा गीत सार्वजनिक (भिडिओ)

काठमाडौं । सातौं सामाजिक सुरक्षा दिवसको अवसरमा सन्देशमुलक गीत सार्वजनिक गरिएको छ । गीतमा सामाजिक सुरक्षा कोषको महत्व र यसका फाइदाहरु विषयमा जानकारी दिइएको छ । उक्त गीत महिलाको निम्ति महिला मञ्च नेपालको युट्युब च्यानल वुफोवन (WOFOWON) मा सार्वजनिक गरिएको हो ।

गीतमा सामाजिक सुरक्षा कोषकी उप निर्देशक सुशिला पौडेल, महिला मानव अधिकार रक्षकहरुको राष्ट्रिय सञ्जालकी अध्यक्ष श्यामकुमारी शाह र वरिष्ठ लोक तथा दोहोरी गायिका शिला आले लगाएत अन्य कलाकारहरुको उपस्थिति रहेको छ । गितमा वोफोवन सांस्कृतिक समूहका कलाकारहरुले आवाज दिएका छन् ।

समाजका ज्वलन्त सामाजिक सवाल र असंगठित क्षेत्रका श्रमिकका सवालमा केन्द्रित भई तयार गरिएको गितलाई महिलाको निम्ति महिला मञ्च नेपालको युट्युब च्यानलमा हेर्न सकिन्छ ।

भिडिओः

महिलाको निम्ति महिला मञ्च नेपाल मनोरञ्जन तथा सत्कार (डान्सबार, दोहोरी साँझ, क्याबिन रेस्टुरेण्ट, खाजाघर तथा स्पा÷मसाज पार्लर) क्षेत्रमा कार्यरत श्रमिक महिलाहरुको नेतृत्वमा काठमाडौं जिल्ला प्रशासनमा विधिवत रुपमा (मिति २०६४ साल चैत्र ६ गते) दर्ता भएको नेपालकै पहिलो गैरसरकारी संस्था हो ।

यो संस्था मनोरञ्जन तथा सत्कार क्षेत्रमा कार्यरत श्रमिक महिलाहरुको अधिकार प्रवद्र्धन तथा सुनिश्चिताको लागि अभियानरत छ । महिला श्रमिकहरुको कामको सम्मान साथै कार्यरत क्षेत्रमा हिंसामुक्त, सुरक्षित र मर्यादित काम गर्ने वातावरण हुनु पर्दछ भन्ने उद्देश्य र मान्यताका साथ आफ्ना गतिविधिहरु संचालन गर्दै आइरहेको छ ।

मनोरन्जन तथा सत्कार क्षेत्र असंगठित क्षेत्र अन्र्तगतको श्रममा पर्दछ । यस क्षेत्रका श्रमिकको श्रमको सरक्षा, सम्मान र मान्यता अझै स्थापित हुन सकेको छैन । श्रम ऐनको प्रभावकारी कार्यन्वयनको अभावले गर्दा असंगठित क्षेत्रका श्रमिकहरूको सामाजिक सुरक्षा कोषमा आबद्धता चुनौतीपूर्ण छ । सामाजिक सुरक्षा कोषमा आबद्ध हुन, श्रमिकहरूले न्यूनतम पारिश्रमिकको २०.३७ प्रतिशत योगदान गर्नुपर्छ, जसमा ११ प्रतिशत श्रमिक र ९.३७ प्रतिशत सरकारको योगदान हुन्छ ।

सामाजिक सुरक्षा कोषको स्थापना सामाजिक सुरक्षा (व्यवस्थापन कोष तथा सञ्चालन) नियमावली, २०६७ जारी भई सो बमोजिम २०६७ साल चैत्र ७ गते भएको हो। यस कोषले स्थापनाकाल देखि सामाजिक सुरक्षा करको व्यवस्थापन गर्दै आएकोमा योगदानमा आधारित सामाजिक सुरक्षा ऐन, २०७४ जारी भएपछि सो ऐन बमोजिम कार्य गर्दै आएको छ ।

ऐनको प्रस्तावनामा उल्लेखित श्रमिकको योगदानमा आधारित सामाजिक सुरक्षाको हक सुनिश्चित गर्नु तथा योगदानकर्तालाई सामाजिक सुरक्षा प्रदान गर्नु यस कोषका उद्देश्य हुन् । सामाजिक सुरक्षा कोष दिवस नेपाल सरकारले सामाजिक सुरक्षा ऐन जारी भएपश्चात प्रत्येक वर्ष मंसिर ११ गते मनाउने गर्दछ ।