‘मिस प्लानेट’ मा नेपालकी अनिषाले जितिन ‘मिस ह्यूमानिटी’ को टाइटल

काठमाडौं । कम्बोडियामा आयोजित मिस प्लानेट प्रतियोगितामा नेपालकी सुन्दरी अनिषा पराजुलीले ‘मिस ह्युमानिटी’ को टाइटल जितेकी छन् । मिस प्लानेटको चौंथो संस्करणमा यूएईले उपाधि जित्दा नेपालले पहिलोपटक कुनै पनि विधामा जित हासिल गरेको हो ।

वीर नर्सिङ क्यान्पसमा मास्टर्स अध्ययनरत अनिशा मनोचिकित्सक नर्स हुन् । केही समयअघि काठमाडौंमा भएको नर्सहरुको सौन्दर्य प्रतियोगिता ‘मिस नेपाल पिस’ मा उनी फर्स्ट रनअरअप बनेकी थिइन् ।

सोही सफलतापछि उनी नेपालको प्रतिनिधित्व गर्दै कम्बोडिया पुगेकी हुन् । मिस प्लानेटको थिम यस वर्ष ‘विकास सँगसँगै मानसिक स्वास्थ्य सचेतना’ रहेको थियो ।

प्रतियोगितामा अनिषा टप २० सम्म पुगेकी थिइन् । प्रतियोगितामा मिस प्लानेट इन्टरनेटसनल यूएई र मिस एन्जल प्लानेट इन्टरनेसनलको उपाधि मिस इन्डोनेसियाले पाएकी छन् । दुवै विधाको बराबरी महत्व हुने आयोजकले जनाएको छ ।

प्रतियोगितामा आयोजक राष्ट्र मिस कम्बोडियाकी सुन्दरीले अन्तिम समयमा आफ्नो नाम फिर्ता लिएकी थिइन् । उनको स्थानमा मिस कम्बोडियामा रनरअप भएकी सुन्दरीलाई स्थान दिइएको थियो । उनी टप २० मा अटाउन सकिनन् ।