कीर्तिपुरमा रास्वपाले कसैलाई समर्थन नगर्ने टुंगो, आफूले उम्मेदवारी नदिएका सबै ठाउँमा तटस्थ बस्ने

काठमाडौं । राष्ट्रिय स्वतन्त्र पार्टी (रास्वपा) कीर्तिपुर नगरपालिकाको मेयरको चुनावमा तटस्थ बस्ने भएको छ । मेयरमा उम्मेदवारी नदिएको रास्वपाले स्वतन्त्र उम्मेदवारलाई समर्थन गर्ने बताउँदै आएको थियो ।

रास्वपाका उपचुनाव कमाण्डर गणेश पराजुलीले कुनै एउटा स्वतन्त्र उम्मेदवारलाई समर्थन गर्न व्यवहारिक कठिनाइ आइपरेको बताए । रास्वपाले अब आफूले उम्मेदवारी नदिएका स्थानमा पार्टीका समर्थकलाई स्वविवेकमा निर्णय लिन छोडिदिएको उनको भनाइ छ ।

उनले भने, ‘कीर्तिपुरसहित हामीले कुनै पनि ठाउँमा अन्य उम्मेदवारलाई समर्थन गर्न सक्ने अवस्था भएन । अन्य दलका उम्मेदवारलाई नसघाउने पार्टीको नीति र स्वतन्त्र उम्मेदवार कसलाई छान्ने भन्नेमा अन्योलताले गर्दा तटस्थ बस्दा नै उचित हुने सिफारिस स्थानीय कमिटीहरुबाट प्राप्त भएको छ । सायद त्यही नै हुन्छ होला ।’

कीर्तिपुरमा एकजना स्वतन्त्र उम्मेदवारलाई समर्थन गर्न रास्वपाले निकै कसरत गरेको थियो । पराजुलीका अनुसार सबै स्वतन्त्र उम्मेदवारहरुलाई एक ठाउँमा ल्याएर एकजना मात्रै उठाउने पहल गरिए पनि त्यो सफल भएन ।

उनी भन्छन्, ‘स्वतन्त्र उम्मेदवारहरुलाई एक ठाउँमा ल्याउन हामीले पुरा प्रयास लगाएका हौं । तर, त्यो सफल नभएपछि कुनै एक उम्मेदवारलाई समर्थन गर्न हामीले सकेनौं ।’

रास्वपाले उपनिर्वाचन हुने ४४ स्थानमध्ये २७ स्थानमा मात्रै उम्मेदवारी दिएको छ । यो उपनिर्वाचनलाई आफूहरुले लोकप्रियता परीक्षणको कसीका रुपमा नलिने पराजुली बताउँछन् ।

उनले भने, ‘स्थानीय निर्वाचनमा हाम्रो पार्टी जन्मेको नै थिएन । त्यसमा छुटपुट भएका थोरै स्थानमा मात्रै उपचुनाव हुने हो । यो उपचुनावले नै जनमतको परीक्षा हुन्छ भन्ने हामीलाई लाग्दैन । यद्यपि, हामीले आफ्नो उम्मेदवारहरुलाई जिताउनका लागि सबै प्रयास लगाउने छौं ।’