लुम्बिनी उपनिर्वाचन : आधार इलाकामै कमजोर भयो माअ‍ोवादी, कांग्रेस एमालेमा किचलो

रुपन्देही । स्थानीय तहको उपनिर्वाचनमा लुम्बिनीमा नेकपा एमालेले यसअघि गुमाएको एक वडाध्यक्ष पदमा जित निकालेको छ भने अन्य स्थानमा मत बढाए पनि बर्दियामा मत घटाएको छ ।

कांग्रेसले यसअघि जितेको एक वडाध्यक्ष गुमाउँदा माओवादीको अघोषित सहयोग पाउँदा रोल्पा–गुल्मी र बर्दियामा कांग्रेसले आफ्नो विरासत कायम राखेको छ । रुकुमपूर्वको वडामा माओवादी केन्द्रले आफ्नो विरासत सुरक्षित बनाउँदा अन्य स्थानमा निकै तल खस्केको छ ।

कपिलवस्तुमा कांग्रेसको एक सीट एमालेले खोस्दा चर्चामा रहेको रास्वपाको कतै प्रभावशाली मत आएको छैन भने नेकपा एसले कुनै स्थानमा जमानत पनि जोगाउन सकेन ।

एक पालिका उपाध्यक्ष र ५ वडाध्यक्षसहित ६ पदमा भएको निर्वाचनमा वडाअध्यक्षको मत परिणाम सार्वजनिक भइसकेको छ भने रुकुमपूर्वको पुथा उत्तरगंगा गाउँपालिकाको उपाध्यक्षको मतगणना आज बिहान मात्रै सुरु गरिने छ । यहाँ भने माओवादीविरुद्ध कांग्रेसको चुनाव चिन्हमा एमालेका उम्मेदवार रहेका छन् । यो माओवादीको बलियो क्षेत्र मानिएको स्थान हो ।

कहाँ को विजयी र कस्तो आयो मत परिणाम ?

गुल्मीको मुसिकोट नगरपालिका वडा नं १ मा नेपाली कांग्रेस विजयी भएको छ । यहाँ यसअघि नेपाली कांग्रेसले माओवादी केन्द्रसहितको गठबन्धनको साथ पाएर विजयी भएको थियो । तर अहिले माओवादीको अघोषित साथ पाएर अघिल्लो निर्वाचनभन्दा बढी मतान्तरले जितेको हो । काङ्ग्रेसबाट उम्मेदवार बनेका आनन्द श्रेष्ठले ११८४ मत ल्याएर विजयी भएका हुन् ।

एमालेका दलबहादुर थापाले ९३० मत ल्याएका थिए । माओवादी केन्द्रका दुर्गाबहादुर विकले १४३ मत ल्याएका छन् । गत निर्वाचनमा ३९ मतले मात्रै हारेको एमालेलाई हराउन माओवादीले कांग्रेस उम्मेदवारलाई साथ दिएको आरोप लागेको छ ।

माओवादी केन्द्रका नेताहरूले यहाँ कांग्रेस, एमाले र आफ्नो त्रिपक्षीय प्रतिस्पर्धा रहेको बताएका थिए । नेकपा एस, विप्लव नेतृत्वको माओवादीसमेतको साझा उम्मेदवार बनेका माओवादी केन्द्रका दुर्गाबहादुर विकको अपेक्षित मत पाउन सकेनन् ।

आइतबार भएको निर्वाचनमा २ हजार ३ सय ३४ मत खसेको थियो । मुसिकोट नपा १ मा ४ हजार ९१ मतदाता थिए । २०७९ मा काङ्ग्रेसबाट विजयी उम्मेदवार मोहन घिमिरेको मृत्यु भएपछि उपनिर्वाचन भएको थियो ।

रोल्पाको रुन्टीगढी गाउँपालिका वडा नं ४ को वडाअध्यक्ष कांग्रेसका उम्मेदवार भूपमणि पुनमगर निर्वाचित भएका छन् । उनले ६४३ मत पाएका छन् ।

उनका निकटतम प्रतिद्वन्द्वी एमालेका बेगम पुनले ५३५ मत पाएका छन् । अघिल्लो निर्वाचनमा कांग्रेस र एमाले उम्मेदवारबीच ८ मतको अन्तर थियो । सबै १९०० मतदाता रहेकोमा १२९७ मत खसेको थियो । तेस्रो स्थानमा रहेका माओवादी केन्द्रका उम्मेदवारले ७० मत पाएका थिए । यसअघिको निर्वाचनमा माओवादीले पाएको मतभन्दा ६५ प्रतिशत कम मत पाएको छ । माओवादीले आधार इलाका मानेको यो जिल्लामा यो मत परिणामले कांग्रेसलाई जिताउन अघोषित सहयोग गरेको प्रष्ट देखिन्छ ।

२०७९ मा भएको स्थानीय तहको निर्वाचनबाट कांग्रेसका तर्फबाट निर्वाचित वडाअध्यक्ष टंकबहादुर पुनको मृत्यु भएपछि उपनिर्वाचन भएको हो ।
कपिलवस्तु जिल्लाको शुद्धोधन गाउँपालिका–१ को वडाध्यक्ष पदको उपनिर्वाचनमा एमालेका मोहम्मद ताहिर मुसलमान विजयी भएका छन् ।

उनले १ हजार १ सय ५० मत पाएर विजयी भएका हुन् । उनका निकटतम प्रतिद्वन्द्वी नेपाली काँग्रेसका दिनेश कुमार यादवले १ हजार ७६ मत पाएको मुख्य निर्वाचन अधिकृत प्रकाशचन्द्र अधिकारीले बताए । त्यसै गरी जनमत पार्टीका सीताराम पटेल कुर्मीले ४ सय २३ र जसपा नेपालका रामबहादुर कुर्मी चौधरीले ३ सय ४१ मत प्राप्त गरेका छन् ।

४ हजार ८ सय ६८ मतदाता रहेको वडाको निर्वाचनमा ३ हजार ३ सय ७९ जनाले मतदान गरेका थिए । वडाध्यक्षका लागि दलका १० जना र स्वतन्त्र ४ जना गरी १४ जना उम्मेदवार थिए । कांग्रेसबाट विजयी वडाध्यक्ष तिलकराम यादवको निधन भए पछि उपनिर्वाचन भएको हो । त्यस्तै, जनमत पार्टीका सीताराम पटेल कुर्मीले ४ सय २३ मत प्राप्त गरेका छन् भने जसपा नेपालका रामबहादुर कुर्मी चौधरीले ३ सय ४१ मत प्राप्त गरेका छन् ।

निर्वाचन आयोगका अनुसार माओवादी केन्द्रका उम्मेदवार रफि मोहम्मद मुसलमानले १ सय ३८ मत ल्याउँदा रास्वपाका अशोककुमार चौधरीले ९२ मत ल्याएका थिए भने राप्रपा उम्मेदवार इनताज अहमद धोवीले ६६ र नागरिक उन्मुक्तिका उम्मेदवार सूर्यकुमार चौधरी थारुले ३३ मत प्राप्त गरेका छन् । यहाँ पनि माओवादीको मत घटेको छ । एमाले केन्द्रीय सदस्य गिरिधारीलाल न्यौपानेले कपिलवस्तुका सबै स्थानमा एमाले बलियो बन्दै गएको बताए ।

बर्दियाको ठाकुरबाबा नगरपालिका वडा नं ४ मा नेपाली काँग्रेसका अमिन थारू विजयी भएका छन् । थारूले एक हजार ४३ मत ल्याएर विजयी हुँदा निकटतम प्रतिद्वन्द्वी नेकपा माओवादी केन्द्रका शेरबहादुर थारूले छ सय ७८ मत ल्याएका छन् ।

त्यसैगरी नेकपा एमालेका विष्णुप्रसाद देवकोटाले तिन सय ३७ मत ल्याएर तेस्रो स्थानमा पुगेका हुन् । नागरिक उन्मुक्ति पार्टीका प्रितिलाल थारूले ७०, राष्ट्रिय प्रजातन्त्र पार्टीका रत्नबहादुर शाहीले ५२ र राष्ट्रिय स्वतन्त्र पार्टीका बासुदेव शर्माले १७ मत मात्रै ल्याएका छन् ।

निर्वाचनमा ४० मत बदर भएको मुख्य निर्वाचन अधिकृतको कार्यालयले जनाएको छ । कुल मतदाता संख्या तिन हजार पाँच सय १० मध्ये दुई हजार दुई सय ३९ मत खसेको थियो ।

यसअघिको स्थानीय तहको निर्वाचनमा पनि नेपाली काँग्रेसका सूर्य बहादुर विष्ट विजयी भएका थिए । उनी जिल्ला समन्वय समितिको प्रमुख भएपछि वडा सदस्य अमिन थारुले कार्यवाहक वडाध्यक्ष जिम्मेवारी सम्हालेका थिए । कार्यवाहक वडाध्यक्ष अमिन थारुले राजीनामा दिएर चुनाव लडेका थिए । एमालेले गत निर्वाचनमा एमालेको भन्दा करिब २ सय मत कम ल्याएको छ ।

रुकुमपूर्वको पुथा उत्तर गंगा २ मा माओवादी केन्द्रका उम्मेदवार निर्विरोध भएका थिए ।