डा. देवी क्षेत्रीको उपन्यास ‘कर्णेल गजराज सिंह थापा’ विमोचन

इलाम । डा. देवी क्षेत्री दुलालद्वारा रचित ऐतिहासिक उपन्यास ‘कर्णेल गजराज सिंह थापा’ विमोचन गरिएको छ ।

नेपाल प्रज्ञाप्रतिष्ठानका प्राज्ञ परिषद् सदस्य तथा सामाजिक शास्त्र विभाग प्रमुख डा. कौशिला रिसालको प्रमुख आतिथ्यमा बुद्धिप्रसाद घिमिरे स्मृति प्रतिष्ठानले उपन्यास विमोचन गरेको हो ।

प्रमुख अतिथि प्राज्ञ डा. कौशिला रिसाललगायत प्रा.डा.गोविन्दराज भट्टराई, पूर्व मन्त्री सोमनाथ बास्तोला, पूर्व सांसद अगम बान्तवा र उपप्राध्यापक युद्धप्रसाद वैद्यले संयुक्त रूपमा उक्त उपन्यासको विमोचन गरेका थिए ।

उक्त विमोचन कार्यक्रमलाई सम्बोधन गर्दै प्रमुख अतिथि रिसालले ‘कर्णेल गजराजसिंह थापा’ जस्तो ऐतिहासिक र जीवनीपरक उपन्यास सिर्जना गरेकामा उपन्यासकार दुलाललाई बधाई ज्ञापन गर्दै नयाँ पुस्ताले अग्रज पुस्ताका महत्त्वपूर्ण योगदानबाट अभिप्रेरणा लिँदै लक्ष्य भेदनमा पुग्नुपर्ने बताइन् ।

प्रमुख अतिथि रिसालले आफू प्रज्ञाप्रतिष्ठानको सामाजिशास्त्र विभागको नेतृत्वमा रहेकाले सामाजिक शास्त्रसम्बन्धी यस्ता खोज तथा अनुसन्धानमूलक सामग्रीहरूको प्रवर्द्धन गर्दै स्रष्टालाई निरन्तर प्रोत्साहित गर्ने प्रतिबद्धता व्यक्त गरिन् ।

कार्यक्रमका विशिष्ट अतिथि एवम् प्रमुख वक्ता प्रा.डा. गोविन्दराज भट्टराईले पुस्तकमा थापाको ऐतिहासिक योगदानलाई अभिलेखीकरण गरिएको र नेपालको पहिलो उद्योग इलामको चिया कारखाना भएको तथ्य समेत उजागर गरेका थिए । यस्तै युद्धप्रसाद वैद्यले पनि पुस्तक र इलामको इतिहासबारे आफ्नो भनाइ राखेका थिए ।

उपन्यास सर्जक डा. देवी क्षेत्री दुलालले आफूले यो पुस्तक निकै लामो समयको खोज अनुसन्धान गरेर मात्रै तयार पारेको बताएका थिए ।

विसं १९२० मा कर्णेल थापाले नै इलाममा चिया खेतीको सुरुवात गरेका थिए । कर्णेल गजराज सिंह थापाले इलामको चियाखेतीको सुरुवात र बिस्तारमा महत्त्वपूर्ण योगदान पुर्‍याएको चर्चा हुँदै आएको छ ।

बिस १९३५ मा इलाममा चियाउद्योग स्थापना गरी थापाले पूर्वी क्षेत्रलाई कृषिमार्फत आर्थिक क्रान्तिमा जोडेको विषय उपन्यासमा उल्लेख गरिएको छ।