उपनिर्वाचनको मतपरिणामबारे राप्रपाको प्रतिक्रिया- हामीले जितेनौं तर निराश र विचलित छैनौं

काठमाडौं । स्थानीय तहको उपनिर्वाचनमा राष्ट्रिय प्रजातन्त्र पार्टीले अपेक्षित मत ल्याउन नसकेपछि स्थानीय तहको उपनिर्वाचनको परिणामले फेरि पनि असफल दलहरुलाई मतदाताले छनौट गरेको देखिएको प्रतिक्रिया दिएको छ।

राप्रपाका प्रवक्ता मोहन श्रेष्ठले निर्वाचन नजितेपनि राजनीति नहारेकोको बताए।

उनले भनेका छन्, ‘स्थानीय तहको अघिल्लो निर्वाचनमा अहिले उपनिर्वाचन भएको अधिकांश स्थानमा राप्रपाका उमेदवार समेत थिएनन्, यसपटक सबै ठाऊँमा उमेदवार खडा गर्नु, अनेकौं प्रतिकुलताका बाबजुद विगतमा उमेदवारी भएको अधिकांश ठाऊँमा यसपटक मत बढाउनु सकारात्मक छ। अहिले प्राप्त परिणाम आलोचक र ईर्ष्यालुलाई त आलोचनाको विषय बन्नसक्छ तर परिणाम अपेक्षित नभएपनि लगभग हाम्रो सर्वेक्षण र अनुमानको वरिपरि नै छ।’

झुट, लुट, कुशासनको विकराल पहाड भत्काउन एउटा चुनाव पर्याप्त नहुने भन्दै देशको केही स्थानमा भएको उपचुनावको परिणामबाट निराश र विचलित हुन नहुने बताए।

उनले थपे, ‘परिणामले दिएको सन्देश बुझ्न र तदअनुरुपको योजना बनाउने मौकाको रुपमा लिँदै हामीले यो परिणामलाई स्विकार गर्नुपर्दछ। अध्यक्ष राजेन्द्र लिङ्देनको नेतृत्वमा राप्रपाको गुणात्मक रुपान्तरण र आगामी निर्वाचनको तयारीमा विलम्ब नगरौं।’

यो निर्वाचनको परिणामले निर्वाचन दौरानका परिदृश्यहरु, प्रतिस्पर्धी दलका रवैयाहरु, मतदाताको मनोविज्ञान, हाम्रो कार्यशैली लगायतका समग्र विषयको समिक्षा गर्दै, सुधार गर्नुपर्ने विषयको पहिचान गरी सुधार गर्दै आवश्यक रणनीति तय गर्ने अवसर दिएको उनले बताए। राप्रपाले अवलम्बन गरेको नीति र मार्गचित्र बाहेक अर्को बाटोबाट देशको भविष्य सुरक्षित नभएको जिकिर गरे।