‘पूर्णबहादुरको सारङ्गी’ले गर्‍यो पौने ४७ करोडको व्यापार, ५० करोडको ‘माइलस्टोन’ छुन सक्ला ?

काठमाडौं । गत कात्तिक १५ बाट प्रदर्शन भएको ‘पूर्णबहादुरको सारङ्गी’ले ३१ दिनमा ४६ करोड ७९ लाखको कारोबार गरेको छ । ५० करोडको ऐतिहासिक बक्स अफिस रेकर्डको बाटोमा हिँडेको यो चलचित्र अहिले पनि हलहरुबाट हट्न मानिरहेको छैन ।

‘पूर्णबहादुरको सारंगी’पछि दुई नेपाली चलचित्र ‘ह्रश्व-दीर्घ’ र ‘तेल भिसा’ प्रदर्शन भए, तर यी चलचित्रले पनि ‘पूर्णबहादुरको सारंगी’ लाई विस्थापित गर्न सकेनन् ।

चलचित्रले ५० करोडको रेकर्ड राख्ला त भन्ने प्रश्नमा निर्माता विनोद पौडेलले भने, ‘यो चाहिँ अब भारतीय चलचित्र ‘पुष्पा २’ मा भर पर्छ । हलहरुले यही रफ्तारमा शोहरु दिइराखे र चलचित्रले दैनिक २०-२५ लाखको कारोबार गरिराख्यो भने असम्भव होइन ।’

‘पुष्पा २’ को एक शोले लगभग ४ घण्टा समय खाइदिनेछ । यस दक्षिण भारतीय चलचित्रको रन टाइम नै सवा ३ घण्टा छ । यही कारण ५० करोड हिर्काउने कुरा ‘पूर्णबहादुरको सारंगी’का लागि चुनौतीपूर्ण देखिन्छ ।

आफूहरु भने ५० करोड नै पुग्नुपर्छ भनेर नलागेको निर्माता पौडेल बताउँछन् । चलचित्रले आजसम्म जति दर्शकको माया पायो, त्यो नै काफी रहेको उनको भनाइ छ । यसले विदेशमा लाइफटाइम कलेक्सन २५ करोड हाराहारी गर्ने उनले बताए ।
चलचित्रको कथा अपुरो भएकाले यसको सिक्वेल पनि बन्ने पौडेलको जानकारी दिए ।

‘यसको कथा अपुरो छ । बाटुलीको संघर्ष हेर्नै बाँकी छ नि त ! दर्शकले पनि बाटुलीको कथा किन देखाएन भन्छन् ? हामीले त्यसलाई लुकाएकै हो’, पौडेलले भने, ‘सबै कुराहरु मिल्नुपर्‍यो, टीमले सरसहयोग गर्‍यो भने नमिल्ने भन्ने होइन । भोलि प्रकाश सपूतजीले मान्नुभएन भने त सिक्वेल बन्दैन नि ! अन्य कलाकारले पनि मान्दिनु भएन भने बन्दैन । हामी यो कथालाई ३-४ भनेर लैजादैनौं । पार्ट एक र पार्ट दुई कथा हामीसँग छ ।’

पौडेलले कलाकारले नमानेको खण्डमा सिक्वेल बन्दैन भन्नुका पछाडि चाहिँ सपूत नै कारक हुन् । यो चलचित्र प्रदर्शनको क्रममा सपूतले आफ्नो चलचित्र ‘वसन्त’भन्दा अगाडि प्रदर्शनमा नल्याउने भन्ने सम्झौता तोडेको भन्दै स्टाटस नै लेखेका थिए । साथै यस्ता गैरव्यवसायिक टीमसँग फेरि काम गर्न नपरोस् भनेर घोषणासमेत गरेका थिए भने चलचित्रको प्रमोसनमा पनि हिँडेका थिएनन् ।

यद्यपि चलचित्रलाई दर्शकले औधी रुचाउन थालेपछि भने सपूत हल भिजिटमा निस्केका थिए ।