कीर्तिपुरमा कांग्रेस र एमाले उम्मेदवारबीच हजार भोटको दूरी, गन्न बाँकी कति ?

काठमाडौं । कीर्तिपुर नगरपालिकाको मतगणना उत्तरार्द्धमा पुग्दा कांग्रेस र एमाले मुख्य प्रतिस्पर्धामा छन् । पछिल्लो मतगणनामा कांग्रेसले एमालेलाई ठीक एक हजार मतले पछि पारेको छ ।

कांग्रेस उम्मेदवार कृष्णमान डंगोलले ४ हजार १ सय ८ मत ल्याउँदा एमालेका डा. सुरेन्द्र श्रेष्ठले ३ हजार १०८ मतका साथ पछ्याएका हुन् । अब कृष्णमानलाई भेट्टाउनका लागि सुरेन्द्रले आफ्नो मतसंख्या ह्वात्तै बढाउनुपर्ने हुन्छ ।

तेस्रो स्थानमा रहेका माओवादी उम्मेदवार शिव शरण महर्जनले २ हजार ७ सय ४० मत ल्याएका छन् । एमाले र माओवादी उम्मेदवारबीच ३६८ मतको फरक छ ।

कीर्तिपुर मेयरको दौडमा ११ जना स्वतन्त्र उम्मेवारहरु छन् । उनीहरुमध्ये दुई उम्मेदवारलाई उल्लेख्य मत आइरहेको छ । केटा र केटी चुनावचिन्ह भएका राजमान महर्जनले १४ सय ७५ मत ल्याउँदा कैंची चुनावचिन्ह भएका दिनेशकुमार अधिकारीले १०३९ मत ल्याएका छन् ।

यस्तै, बाकस चुनावचिन्ह भएका कविकुमार महर्जनलाई ९१४ मत आएको छ । राप्रपाका ध्रुव महर्जनले ७४७ मत ल्याएका छन् ।

यो नगरपालिकाका १० वडामा कूल ३१ हजार ११९ मतदाता रहेकोमा २१ हजार ३१५ मत खसेको थियो । अहिलेसम्म १५ हजार ४१९ मत गणना भइसकेको छ ।