नेपाल–चीन अटोमोबाइल व्यापार र सहकार्य प्रवर्द्धनका लागि नाडा र सीसीपीआईटी अटोबीच सम्झौता

काठमाडौँ । नाडा अटोमोबाइल्स एसोसिएसन अफ नेपाल ९नाडा० र चीन काउन्सिल फर द प्रमोशन अफ इन्टरनेशनल ट्रेड, अटोमोबाइल सब–काउन्सिल (सीसीपीआईटी–अटो) ले महत्त्वपूर्ण सम्झौता (एमओयू) मा हस्ताक्षर गरेका छन् ।

नाडा र सीसीपीआईटी–अटोबीच नेपाल र चीनको अटोमोबाइल क्षेत्रको व्यापार र सहकार्यलाई थप मजबुत बनाउन यो सम्झौता गरेका हुन् ।

प्रधानमन्त्री केपी शर्मा ओलको औपचारिक चीन भ्रमणको क्रममा नाडाको प्रतिनिधित्व गर्दे नाडाका अध्यक्ष करण चौधरी र महासचिव सुरेन्द्रकुमार उप्रेतीसमेतले सहभागिता जनाएका थिए ।

दुई देशका व्यापारिक प्रतिनिधि मण्डलबीच विभिन्न विषयमा छलफल भएको र सोही क्रममा नाडा र सीसीपीआईटी–अटोबीच आर्थिक सम्बन्धलाई सुदृढ गर्ने विषयमा छलफल पनि भएको बताइएको छ ।

उक्त सम्झौताले नेपाल र चीनबीच आर्थिक सम्बन्धलाई सुदृढ गर्न, व्यापार प्रवर्द्धन गर्न र अटोमोबाइल उद्योगमा दिगो विकासका सम्भावनाहरू अघि बढाउन महत्त्वपूर्ण भूमिका खेल्ने नाडाको विश्वास छ । व्यापार मेलाहरू, व्यावसायिक प्रतिनिधिमण्डलहरूको आदानप्रदान र नीति वकालतजस्ता संयुक्त पहलमार्फत दुवै देशका अटोमोबाइल उद्योगका नयाँ सम्भावनाहरू खुलाउने लक्ष्य यो सम्झौताले राखेको छ ।

नाडाले नेपालका अटोमोबाइल क्षेत्रमा लगानीका सम्भावना पहिचान गर्ने, व्यापार मेलाहरू आयोजना गर्ने र नेपाली बजारमा रुची राख्ने चिनियाँ व्यवसायीहरूलाई सहयोग गर्ने सम्झौता पत्रमा उल्लेख छ ।

यस्तै, सम्झौता पत्रमा सीसीपीआईटी–अटोले नेपालमा चिनियाँ लगानी प्रवर्द्धन गर्ने, प्रविधि आदानप्रदानलाई सहयोग गर्ने र संयुक्त कार्यक्रमहरू सञ्चालनमा साथ दिने विषय पनि रहेको नाडाले जानकारी दिएको छ।

नाडाका अनुसार यो साझेदारीको कार्यान्वयनको निगरानी गर्न संयुक्त कार्य समूह गठन गरिनेछ । जसले नियमित प्रगति समीक्षा गर्ने र आवश्यक सुधारका उपायहरू लिने पनि बताइएको छ । दुवै पक्षले बौद्धिक सम्पत्तिको अधिकारको सम्मान गर्ने र सहकार्यका क्रममा गोपनीयता कायम राख्ने प्रतिबद्धता जनाएका छन् ।

यो सम्झौता दुवै देशका अटोमोबाइल उद्योगलाई दिगो र समृद्ध बनाउँदै आर्थिक सहकार्यको नयाँ अध्याय सुरु गर्ने दिशामा ठोस कदम रहेको नाडाको भनाइ छ ।