चितवनमा रवि लामिछानेसँग १२ घण्टा साेधपुछ, बयानकक्षमा नै बिहान-बेलुकीकाे खाना

चितवन । साहरा सहकारीको रकम हिनामिनाको आरोपमा चितवन ल्याइएका पूर्वगृहमन्त्री तथा राष्ट्रिय स्वतन्त्र पार्टीका सभापति रवि लामिछानेको बयान सकिएको छ ।

जिल्ला सरकारी वकिल कार्यालय चितवनमा बिहान ८ बजे रवि लामिछानेलाई लगिएको थियो । अहिले बेलुका ८ बजेसम्म अर्थात् १२ घण्टा बिताएर बयान सकिएको हो । चितवनका जिल्ला न्यायाधीवक्ता शान्तीप्रसाद लुईँटेल र जिल्ला प्रहरी कार्यालय चितवनका अनुसन्धान अधिकृत डिएसपी ज्ञानकुमार महतोले उनको बयान लिएका हुन् ।

बयान आजै सकाउने तयारी गरिएकोले रवि लामिछानेलाई बिहान र बेलुकाको खाना पनि बयान कक्षमा नै खुवाइएको थियो । त्यसबाहेक दिनभर लगाएर हिजो सोधिएको सहित ७४ वटा प्रश्नको जवाफ लामिछानेले बयानमा दिएका थिए ।

बयानका क्रममा सौहार्दरुपमा प्रस्तुत भएका लामिछाने कतिपय प्रश्नको जवाफमा भने अल्मलिएकाे स्राेतकाे दावी छ ।

स्रोतका अनुसार सम्पत्ति शुद्धीकरणसम्बन्धी प्रश्नका क्रममा श्रीमतीको नाममा बढी गएको रकमको प्रश्नमा उनले दिएको जवाफ काठमाडौँमा दिएकोसँग बाझिएपछि उनले काठमाडौँमा दिएको बयान हेरेर सच्याएका थिए ।

प्रहरीले अनुसन्धानका क्रममा प्राप्त गरेको प्रमाण देखाउँदै गरेको कतिपय प्रश्नमा उनले आफूलाई थाहा नभएकाे बताएका छन् ।

सरकारी वकिल कार्यालय स्रोतका अनुसार लामिछानेले कतिपय प्रश्नमा संसदीय समितिमा जवाफ दिइसकेको भनेर टारेका छन् ।

हिजो र आज गरेर चितवनमा बयान सकिएलगत्तै लामिछानेलाई वीरगञ्ज लैजाने तयारी गरिएको छ । यद्यपि प्रहरीले भने आजै वीरगञ्ज पठाउने नपठाउने निर्णय नभएको बताएको छ ।

चितवनका प्रहरी प्रमुख एसपी गौतम मिश्रले वीरगञ्जमा पक्राउ पुर्जी जारी भएको जानकारी भएपनि राति नै पठाउने नपठाउने विषयमा भने कुनै निर्णय नभएको बताए ।