पत्रकार महासंघ लुम्बिनी प्रदेशको भवन उद्घाटन

रूपन्देही । नेपाल पत्रकार महासंघ लुम्बिनी प्रदेश समितिको नवनिर्मित प्रदेश भवनको सोमबार उद्घाटन गरिएको छ । लुम्बिनी प्रदेशका सभामुख तुलबहादुर घर्तीले उद्घाटन गरेका हुन् ।

भवन उद्घाटन समारोहलाई सम्बोधन गर्दै सभामुख घर्तीले जनताको सूचनाको हकलाई प्राथमिकतामा राखेर नागरिकको अधिकार बोल्ने पत्रकारहरूको संस्थाको भवन निर्माण भएकोमा खुशी व्यक्त गरे ।

उनले प्रदेश सरकारको कामका बारेमा प्रश्नहरू पनि उठेको स्वीकार गर्दै सरकारलाई पनि खबरदारी गर्न आग्रह गरे । सभामुख घर्तीले भवन निर्माण गरेर प्रदेश सरकारले गरेको लगानीको प्रतिफल देखिएको बताए ।

उनले आगामी दिनमा पनि सहकार्य गरेर काम गर्ने बताए । यस्तै कार्यक्रममा नेपाल पत्रकार महासंघका निर्वतमान अध्यक्ष विपुल पोखरेलले प्रदेश भवनले महासंघको जग बसाउने काम गरेको बताए ।

उनले नेपाली मिडियाले नै संघीयताको मुद्दा उठाएको बताउँदै प्रदेश संरचना बलियो बनाउनुपर्नेमा जोड दिए । नागरिकको आवाज बनाउने शक्तिका रूपमा पत्रकार महासंघलाई स्थापित गर्ने बेला आएको बताए ।

पत्रकार महासंघ लुम्बिनीका अध्यक्ष वसन्त गिरीले आफ्नो संरचना बनाएर आगामि नेतृत्वलाई सहज हुने वातावरण बनाएको बताए । उनले सबैको साथ र सहयोगले भवन बनेको बताए । लुम्बिनी प्रदेश राजधानी देउखुरी उपत्यकास्थित अर्घाखाँची शितगंगामा भवन निर्माण गरिएको उपाध्यक्ष शुक्रश्रषि चौलागाईले बताए ।

भवन निर्माणका लागि प्रदेश सरकारको धेरै लगानीमा निर्मा गरिएको महासचिव विक्रम खडकाले जानकारी दिए । उनका अनुसार प्रदेश सरकार र महासंघको करिव ८० लाख लागतमा निर्माण गरिएको हो ।