सञ्जय दत्तकी भान्जी स्मिता ! कतापट्टिको नाता ?

काठमाडौं । भारतीय अभिनेता सञ्जय दत्तले पूर्वप्रधानमन्त्री पुष्पकमल दाहाल प्रचण्डकी नातिनी स्मिता दाहालको विहेमा पठाएको भिडिओ सन्देश अहिले चर्चामा छ ।

स्मिताकी आमा तथा प्रचण्डकी छोरी गंगा दाहालले आफ्नो टिकटकमा उक्त भिडिओ सार्वजनिक गरेकी थिइन् ।
सञ्जय दत्तले भिडिओमा आफू प्राविधिक कारणले स्मिताको विवाहमा आउन नपाएको बताएका छन् । चाँडै नेपाल आएर बरबधुलाई शुभकामना दिने इच्छासमेत व्यक्त गरेका छन् ।

दत्तले मोबाइल स्क्रिनमा हेर्दै बोलेको हिन्दी सम्वादको नेपाली रुपान्तरण यस्तो छः

‘नमस्कार । जय भोलेनाथ हरहर महादेव । केही प्राविधिक कारणले गर्दा आज म तपाईंहरुसम्म आउन पाइन । तर, मेरी भाञ्जी स्मिता र सायुज्यलाई विवाहको हार्दिक शुभकामना छ । मेरी बहिनी गंगा र उनको परिवारलाई मेरो तर्फबाट शिवजीको धेरै धेरै आशिर्वाद । तपाईंहरुसित चाँडै भेट्नेछु । मेरो तर्फबाट धेरैधेरै शुभकामना । गंगा बहिनी, धेरै छिटो आएर भेट्नेछु र बच्चाहरुलाई आफ्नो आशिर्वाद दिनेछु । थ्यांक यु र चाँडै भेट्नेछौं । हरहर महादेव । जय भोलेनाथ ।’

यो भिडिओ सन्देशले धेरैलाई आश्चर्यमा पनि पारेको छ । सञ्जय दत्तसँग गंगा र स्मिताको निकटताको विषयमा धेरै कमलाई थाहा थियो । सञ्जय दत्तले गंगालाई बहिनी र स्मितालाई भाञ्जीको नाता लगाउनुमा विभिन्न अड्कलवाजीहरु भइरहेका छन् ।

गंगाका पहिलो श्रीमान (स्मिताका पिता) नारायणविक्रम प्रधान नेपाली मूलका भारतीय हुन् । गंगा र नारायणबाट एक सन्तानका रुपमा स्मिताको जन्म भएको हो ।

स्मिताले आफनो नाममा पिताको नभएर मावली थर प्रयोग गर्ने गरेकी छिन् । उनले नागरिकता पनि स्मिता दाहाल कै नाममा निकालेको बताइन्छ ।

प्रधानसँग सम्वन्ध टुटेपछि गंगाले जीवन आचार्यसँग दोस्रो विवाह गरिन् । जीवन आचार्य कोशी प्रदेशसभा सदस्य छन् ।

पहिलो श्रीमान भारतीय भएकाले उनीतिरबाट सञ्जय दत्तसित कुनै साइनो जोडिएको हुन सक्ने आशंका कतिपयले गरिरहेका छन् । तर, पारिवारिक स्रोतका अनुसार उनीहरुबीच कुनै पनि नाता–सम्वन्ध छैन । सञ्जय दत्तले आत्मियता दर्शाउन गंगालाई बहिनी र स्मितालाई भाञ्जी भनेका हुन् ।

प्रचण्ड प्रधानमन्त्री भएको बेला भारत भ्रमणमा जाँदा सँगै गएकी गंगाले सञ्जय दत्त लगायत केही कलाकारहरुसँग भेटेकी थिइन् । सो पश्चात उनीहरुको बेलाबखत कुराकानी हुने गरेको थियो । स्मिताले पनि भारत गएका बेला सञ्जयदत्तलाई भेटेको बुझिएको छ ।

यही चिनापर्चीका आधारमा गंगाले सञ्जय दत्तलाई छोरीको विहेमा विद्युतीय माध्यमबाट निम्तो पठाएकी थिइन् । उनले भारतीय प्रधानमन्त्री नरेन्द्र मोदीदेखि कलाकारहरु सुरेश ओबराय, कैलाश खेर लगायतलाई पनि निमन्त्रणा गरेकी थिइन् ।

मोदीले पठाएको सन्देश गंगाले सार्वजनिक गरिसकेकी छन् । सुरेश ओबराय र कैलाश खेरले पनि शुभकामना सन्देश पठाएको बुझिएको छ । सुरेश र उनका छोरा विवेक ओबराय नेपाल भ्रमणमा आएका बेला खुमलटारस्थित निवासमा पुगेर प्रचण्ड परिवारलाई भेटेका थिए ।