काभा मेन्स भलिबल क्लव च्याम्पियनसिपः इरान यू-१८ सेमिफाइनलमा

काठमाडौं । इरानको यू-१८ टीमले काभा मेन्स भलिबल क्लव च्याम्पियनसिपमा लगातार तेस्रो जित हात पार्दै काभा मेन्स भलिबल क्लव च्याम्पियनसिपको सेमिफाइनलमा प्रवेश गरेको छ ।

भारतको क्यालिकटलाई सोझो सेटमा पराजित गर्दै इरानको युवा टीम एक खेल अगाडि नै सेमिफाइनलमा पुगेको हो ।

राष्ट्रिय खेलकुद परिषद्को कभर्ड हलमा आज भएको क्यालिकट र इरानी टीमबीचको खेल प्रतिस्पर्धात्मक हुने अनुमान गरिएको थियो, तर इरानको युवा खेलाडीहरूको प्रदर्शन उत्कृष्ट रह्यो ।

पहिलो सेट प्रतिस्पर्धात्मक बने पनि २७:२५ ले इरानले जित्यो । एक सेट गुमाएपछि दोस्रो सेटमा पनि क्यालिकट खेलमा फर्कन सकेन । सहजै इरानको यू-१८ टीमले २५:२२ ले जित्यो । खेलमा २-० सेटको स्पष्ट अग्रता कायम गर्‍यो । २५:२० ले तेस्रो सेट पनि सहजै इरानले जित्यो ।

यो सोझो सेटको जितमा इरानले लगातार तेस्रो जितसहित ७ अंक बनाएको छ । इरानले यसअघि पहिलो खेलमा माल्दिभ्सको क्लव एचडीसीलाई र दोस्रो खेलमा नेपालको गण्डकी प्रदेश भलिबल संघलाई ३-२ को सेटमा हराएको थियो ।

पराजित क्यालिकटको भने यो दोस्रो हार हो । क्यालिकट पहिलो खेलमा टीमटप हेल्प नेपालसँग हारेको थियो । दोस्रो खेलमा माल्दिभ्सको क्लव एचडीसीलाई हराए पनि आज इरानसँग सोझो सेटमा पराजित भयो । उसले तीन खेलबाट मात्र ४ अंक बनाएको छ ।