विराटनगरको उद्धार गर्दै बसिर अहमदको सानदार अर्धशतक

काठमाडौं । नेपाल प्रिमियर लिग (एनपीएल)मा अर्धशतक बनाउने ब्याटरको सूचीमा बसिर अहमदको नाम थपिएको छ ।

विराटनगरलाई अप्ठेरो अवस्थाबाट उद्धार गर्दै उनले उत्कृष्ट अर्धशतक बनाएका हुन् ।

टस जितेर ब्याटिङ रोजेको विराटनगरले खराब सुरुवात गर्दै १० रनमा तीन विकेट गुमाएको थियो । लोकेश बम, दीपक बोहरा र स्कट एडबर्ड्स सस्तैमा आउट भए । निकोलस किर्टोन पनि ८ रनमा आउट भएपछि नाजुक अवस्थामा पुगेको विराटनगरलाई मार्टिन गुप्टिल र बसिर अहमदले उद्धार गरे ।

गुप्टिल र बसिरबीच ६५ रनको साझेदारी भएको थियो । गुप्टिल ४५ रनमा आउट भए । उनले चार छक्का र एक चौका प्रहार गरेका थिए । त्यसपछि बसिरले विराटनगरलाई अगाडि बढाए । उनले १७.३ ओभरमा रञ्जित कुमारलाई छक्का हान्दै ३९ बलमा अर्धशतक पूरा गरेका हुन् ।

यो समाचार लेख्दासम्म बसिर ४२ बलमा ६६ रन बनाएर खेलिरहेका छन् । उनले आफ्नो इनिङमा ४ छक्का र ४ चौका प्रहार गरेका छन् ।