जनकपुरविरुद्ध चितवनले जित निकाले बाहिरिनेछन् यी दुई टोली

काठमाडौं ।  नेपाल प्रिमियर लिग (एनपीएल) मा चितवन राईनोजले जनकपुर बोल्ट्सविरुद्ध पहिला ब्याटिङ गरिरहेको छ ।

टीयु क्रिकेट मैदानमा जनकपुरविरुद्ध चितवनका कप्तान कुशल मल्लले टस जितेर पहिला ब्याटिङ गर्ने निर्णय लिएर ब्याटिङ गरिरहेको हो ।
जनकपुर यसअघि नै प्लेअफमा स्थान सुरक्षित गराइसकेको छ भने चितवन प्लेअफमा पुग्न संघर्षरत छ ।

६ खेल खेलको जनकपुरले ५ खेलमा जित र एक खेलमा हारसहित शीर्ष स्थानमा छ । ५ खेलमा ८ अंकसहित सुदूरपश्चिम रोयल्स दोस्रो स्थानमा, समान ८ अंकसहित कर्णाली तेस्रो स्थानमा रहदा चितवन ६ अंकसहित चौथो स्थानमा छ ।

चितवनले लिग चरणको अन्तिम खेलमा जनकपुरलाई पराजित गर्दै प्लेअफ पुग्ने सम्भावना बलियो पार्न चाहन्छ । हालसम्म लुम्बिनी लायन्स प्रतियोगिताबाट औपचारिक रुपमा बाहिरिएको छ भने पोखरा एभेन्जर्स र विराटनगर किंग्सको प्लेअफ पुग्ने गणितिय सम्भावना बाँकी छ ।

विराटनगर र पोखरा समान ६ खेलबाट समान ४ अंक जोड्दै क्रमशः छैटौं र सातौं स्थानमा छन् । दुवै टोलीले लिग चरणको अन्तिम खेल खेल्न बाँकी छ । तर, टीयु क्रिकेट मैदानमा जारी खेलमा जनकपुरलाई चितवनले पराजय गरेमा यी पोखरा र विराटनगर औपचारिक रुपमा प्रतियोगिताबाट बाहिरिने छन् ।

यो खेलमा जित निकालेमा चितवनको ८ अंक हुन जान्छ । तर, विराटनगर र पोखराको एक खेल खेल्न बाकी हुँदा समान ४ अंक छ । लिग चरणको अन्तिम खेलमा जित निकाले पनि दुवैको ८ पुग्न सक्दैन । त्यसो हुँदा चितवन, सुदुरपश्चिम, कर्णाली र काठमाडौंमध्ये ३ टोली प्लेअफमा पुग्नेछन् ।

यदि जनकपुरले चितवनलाई पराजित गरेको खण्डमा भने विराटनगर र पोखराको प्लेअफमा पुग्ने गणितिय सम्भावना कायमै रहनेछ ।