५० लाख पारिश्रमिकबारे माग्ने बुढा- म यतिउति भनेर माग्दिनँ, निर्माताले माया गरेर दिएका हुन्

काठमाडौं । ‘माग्ने बुढा’ को उपनामले चर्चित अभिनेता केदारप्रसाद घिमिरे यतिबेला सिने नगरीमा हिट छन् । चलचित्रमा बढ्दो व्यस्ततासँगै उनले लिएको पारिश्रमिकबारे समेत चर्चा चुलिएको छ ।

माग्ने बुढाले एउटै चलचित्रबाट ५० लाख रुपैयाँभन्दा बढी पारिश्रमिक लिने गरेको आफैंले स्वीकारिसकेका छन् । उनलाई अहिले नेपालकै महँगा कलकार मान्न थालिएको छ । योभन्दा अघि नायक अनमोल केसीले उच्च पारिश्रमिकको रेकर्ड बनाएका थिए । अनमोललाई पनि माग्नेले पछि पारेको चर्चा चलिरहेको छ ।

नेपाल प्रेसले यस विषयमा जिज्ञासा राख्दा घिमिरे खुलेर कुरा गर्न अन्कनाए । यद्यपि बजार हल्ला सत्य भएको छनक दिए ।

उनी भन्छन्, ‘म धेरै पैसा कमाउँछु भनेर कलाकारितामा लागेको मान्छे होइन । जे-जस्तो अवस्था आए पनि कलाकारिता चाहिँ गर्छु भन्ने थियो, तर अहिले आएर यस्तो भयो । मलाई यो पारिश्रमिकबारे कुरा गर्नै मन लाग्दैन, तर के गर्नु ? अहिले जताततै यहीमात्र कुरा छ ।’

पारिश्रमिक ५० लाखभन्दा माथि नै लिनुहुन्छ त भन्ने प्रश्नमा उनले जोडे, ‘मैले कहिल्यै यतिउति भनेर मागिनँ । राम्रो कथा आए बाहिरको ब्रान्डमा काम गर्छु भन्ने थियो । स्क्रिप्टहरु सुन्दा मनपर्‍यो । काम गर्छु भन्ने कुरा भएपछि निर्माताहरु आफैंले माया गरेर यति दिन्छु भन्नुभयो । मैले पनि हुन्छ भनें । त्यति हो ।’

आफूलाई कलाकारको ‘मार्केट प्राइस’ कति हो भन्ने थाहा नै नभएको उनको दाबी छ ।

‘म त माग्ने न हो हजुर, खासमा लिनुपर्ने कति रहेछ ? उहाँहरुले जति दिन्छु भन्नुभयो, म त त्यसमा ओके भएँ’, उनले भने ।

टेलिसिरियल हुँदै चलचित्रमा फड्को मारेका माग्ने बुढा ‘छक्कापञ्जा’ टीमका सदस्य हुन् । विगतमा ‘छक्कापञ्जा’ भन्दा बाहिरका चलचित्रमा उनी खासै देखिएनन्, तर अहिले भटाभट बाहिरका फिल्म साइन गरिरहेका छन् । छक्कापञ्जामा उनले लगानी पनि गर्दै आएका छन् । बाहिरका फिल्म भने पारिश्रमिकमा मात्रै काम गरिरहेको उनले बताए ।

घिमिरे भन्छन्, ‘सेयरमा काम गर्दा मनमुटाव हुनसक्छ । मन नमिल्न सक्छ, झन्झट हुन्छ । त्यसैले सेयरमा काम नगरेको हो ।’

उनले अहिलेसम्म ४ वटा बाहिरी ब्रान्डका चलचित्रमा साइन गरिसकेका छन् । चलचित्र ‘माग्ने राजा’ मा त उनी लिड रोलमै देखिने भएका छन् ।

सहायक भूमिकामा रुचाइरहेका दर्शकले तपाईंलाई लिड रोलमा साथ दिन्छन् जस्तो लाग्छ त भन्ने प्रश्नमा उनी भन्छन्, ‘म त दर्शकहरुले मलाई लिड रोलमा झनै माया गर्नुहुन्छ भन्नेमा पूर्ण विश्वस्त छु । उहाँहरुले मेरो काम हेरेर हँसाउन अझै कम भयो भन्नुहुनेछ ।’

केदारका अनुसार चलचित्र ‘माइतीघर’ उनको यो आर्थिक वर्षको लागि साइन गरेको अन्तिम चलचित्र हुनेछ ।

‘अफर त धेरै आइरहेका छन्, तर धेरै चलचित्र साइन गर्दा बिग्रेला भन्ने डर हुन्छ । एक त मलाई स्क्रिप्ट पनि मन पर्नुपर्छ । त्यसैले यो वर्षलाई यति नै ! धेरै चलचित्र गर्ने चक्करमा आफ्नो भएको नाम पनि फितलो हुनसक्छ । यो नामलाई जोगाइराख्न मेहनत गर्नुपर्छ । त्यसैले जति वटामा साइन गरें, त्यतिमै भरपुर मेहनत गर्छु’, उनले सुनाए ।