कुशल भुर्तेलको ‘बिर्सनलायक’ एनपीएल, मार्की खेलाडी नै नचल्दा मर्कामा परेको पोखरा

काठमाडौं । नेपाली राष्ट्रिय टीमका एक महत्वपूर्ण सदस्य कुशल भुर्तेल नेपाल प्रिमियर लिग (एनपीएल)को पहिलो संस्करणमा फ्लप भएका छन् । उनले कप्तानी गरेको पोखरा एभेन्जर्स ७ खेलमा ५ हार व्यहोर्दै प्रतियोगिताको लिग चरणबाटै बाहिरिएको छ ।

भुर्तेलको एनपीएल यात्रा ‘डक आउट’ बाट सुरु भयो भने ‘डक आउट’मै अन्त्य भयो । पोखरा एभेन्जर्सको पहिलो खेलमा चितवन राइनोजविरुद्ध ओपनिङमा आएका भुर्तेल पहिलो बलमै आउट भएका थिए । आज पोखराको अन्तिम खेलमा तेस्रो नम्बरमा आएका उनी तीन बल खेलेर आउट भए । यी दुईबीचका ५ खेलमध्ये ४ खेलमा ब्याटिङ गरेका भुर्तेलले बनाएको उच्च स्कोर हो ३१ रन ।

पहिलो खेलमा डकआउट भएपछि दोस्रोमा उनले आफूलाई तेस्रो नम्बरमा झारेका थिए । जनकपुर बोल्ट्सविरुद्धको सो म्याचमा पनि उनले ६ खेलमा ६ रनमात्र जोड्न सके । तेस्रो म्याचमा लुम्बिनीविरुद्ध उनी ब्याटिङमा आउनै परेन । ओपनर जोडी एन्ड्र्यु गोउस र दिनेश खरेलले नै पोखरालाई १७१ रनको लक्ष्यसम्म पुर्‍याएका थिए । चौथो म्याचमा कर्णालीविरुद्ध पनि भुर्तेल चलेनन् । ११ बलमा १० रन बनाएर आउट भए ।

विराटनगरविरुद्धको पाँचौं खेलमा भुर्तेलले ३४ बलमा ३१ रन जोडे । यही नै उनको प्रतियोगितामा सबैभन्दा ठूलो स्कोर हो । यो खेल बराबरीमा टुंगिएपछि सुपरओभरमा पोखरा पराजित भएको थियो ।

छैटौं खेलमा पनि भुर्तेलले निराश बनाए । पोखराविरुद्ध उनको ब्याटबाट १० बलमा ७ रनमात्रै निस्कियो । आज सुदूरपश्चिमविरुद्ध उनी शून्यमा आउट भए । यसरी प्रतियोगिताका ६ खेलमा ब्याटिङ गर्दा उनले कुल ५४ रन जोड्न सके । उनी प्रतियोगितामा अहिलेसम्म सर्वाधिक रन बनाउने ब्याटरको सूचीमा ४६ औं स्थानमा छन् । राष्ट्रिय टीमबाट अहिलेसम्म नखेलेका थुप्रै युवा ब्याटरले उनको भन्दा धेरै रन जोडेका छन् ।

कुशलको यो खराब प्रदर्शनले पोखरालाई निकै धक्का पुगेको छ । टीमलाई ब्याटिङमा सबैभन्दा बढी उनीबाटै आशा थियो । किनकि राष्ट्रिय टीमबाट खेल्दा कुशलले त्रिवि मैदानमा उत्कृष्ट ब्याटिङ गर्दै आएका छन् । अन्तर्राष्ट्रिय करिअरको पहिलो तीन टी- २० खेलमै लगातार तीन अर्धशतक बनाउने विश्व कीर्तिमानधारी हुन् कुशल । नेदरल्यान्ड्स जस्तो बलियो टीमविरुद्ध त्रिवि मैदानमा उनले यस्तो कीर्तिमान राखेका थिए । त्यसबेला आईसीसीले उनलाई प्लेयर अफ द मन्थसमेत घोषणा गरेको थियो ।

त्यसयता पनि कुशलले अन्तर्राष्ट्रिय म्याचहरुमा थुप्रै अविस्मरणीय इनिङहरु खेलिसकेका छन् । जिम्बाबेविरुद्धको एक दिवसीयमा उनी ९९ रन बनाएर आउट भएका थिए । एसिया कपमा भारत जस्तो शक्तिशाली टीमविरुद्ध समेत विस्फोटक पारी खेल्दै सबैको नजरमा पर्न सफल भए । यद्यपि उनको प्रदर्शनमा एकरुपता भने छैन । सुरुमै जोखिम लिएर खेल्ने शैलीले कुशललाई बारम्बार समस्यामा पारिरहेको हुन्छ ।

त्यसो त त्रिविको पीचले एनपीएलमा ब्याटरहरुलाई उति सहयोग गरिरहेको छैन । यहाँको पीच परम्परागत रुपमा ब्याटिङमैत्री हुने गर्थ्यो, तर अहिले बलर र खासगरी स्पिनरलाई बढी मद्दत पुर्‍याइरहेको छ । यद्यपि सुझबुझका साथ ब्याट चलाउनेहरुले ठूलो स्कोर पनि बनाइरहेका छन् । कुशलको कतै न कतै प्राविधिक कमजोरी उजागर भएको छ । खासगरी नयाँ बललाई खेल्दा अपनाउनुपर्ने सावधानीमा उनी चुकिरहेका हुन्छन् । प्रायः आक्रामक सट खेल्न खोज्दा नै आउट भएका छन् ।

राष्ट्रिय टीममा ब्याट नचल्दा पनि कुशलले बलिङबाट क्षतिपूर्ति गरिरहेका हुन्छन् । उनी नियमित बलर होइनन्, तर उनको पार्टटाइम लेग स्पिन राष्ट्रिय टीममा समेत निकै प्रभावकारी हुने गर्छ । उनी नपत्याउँदो गरी विकेट लिन्छन् । एनपीएलमा उनको बलिङ औसत रह्यो । प्रतियोगिताका ६ खेलमा १४.१ ओभर बलिङ गर्दा कुल ११३ रन खर्चेर पाँच विकेट लिए ।

कुशलबाट बलिङभन्दा पनि ब्याटिङमै आशा गरिन्छ । उनी नेपाली टीमका रेगुलर ओपनर थिए । अहिले तेस्रो स्थानमा खेल्न थालेका छन् । अहिले उनको फर्मले गर्दा राष्ट्रिय टोलीमै स्थान बनाउन सक्छन् वा सक्दैनन् भन्ने सन्देह पैदा भएको छ । थुप्रै युवा खेलाडीले उत्कृष्ट ब्याटिङ गरिरहँदा कुशलको स्थान सुरक्षित देखिँदैन । यद्यपि क्रिकेटमा भन्ने गरिन्छ कि ‘फर्म’ अस्थायी हो र ‘क्लास’ स्थायी । आशा गरौं कि कुशल यो एनपीएलको प्रदर्शनलाई बिर्सिएर चाँडोभन्दा चाँडो आफ्नो लयमा फर्किन सक्नेछन् ।