विजय बराललाई प्रश्न- ‘पूर्णबहादुरको सारंगी’पछि पारिश्रमिक कति पुर्‍याउनुभयो ?

काठमाडौं । यतिबेला सिने नगरीमा केही कुराले बजार तताइरहेको छ भने त्यो हो- कलाकारहरुको पारिश्रमिक । फलानो कलाकारको डिमान्ड यति, ढिस्काना कलाकार यतिविना काम नगर्ने, आदि इत्यादि । केही समय अगाडि फर्केर हेर्ने हो भने सिने क्षेत्रमा नायक अनमोल केसीमात्र एउटा त्यस्ता कलाकार थिए, जो एउटा चलचित्रमा काम गरेको ५० लाख पारिश्रमिक लिने गर्थे । अभिनयमा औसत केसीको स्टारडम र फ्यान क्रेज देखेरै निर्माताहरु उनमा पैसा खनाउन तयार हुन्थे । उनको राम्रो फ्यान फलोअर्सका कारण आफू डुबिँदैन भन्नेमा निर्माताहरु ढुक्क थिए ।

तर ‘छड्के २.०‘ ले त्यो भ्रम पनि छरपस्ट बनाइदियो । चलचित्र चल्न स्टारडमले मात्र हुँदैन, राम्रो कथावस्तु पनि चाहिने रहेछ भन्ने यो चलचित्रले पुष्टि गरिदियो । दशौं चलचित्र सुपर फ्लप भए तापनि उनको पारिश्रमिक भने घटेन । अहिले पनि उनको पारिश्रमिक ५० लाख नै छ । लामो समय ५० लाख पारिश्रमिक लिने अभिनेताको रुपमा एकछत्र राज गर्दै आएका अनमोलको सो सूचीमा अहिले उनीमात्र छैनन् । अहिले सिने बजारमा उनलाई समेत पछि पार्ने अभिनेताको इन्ट्री भइसकेको छ ।

चर्चाअनुसार पहिलो चलचित्रबाटै दर्शकको अविश्वसनीय माया र साथ पाएका विराज भट्टका छोरा समीर भट्टको पारिश्रमिक पनि झण्डै अनमोलको बराबर नै छ । पहिलो चलचित्रको सफलतापछि यतिबेला उनी सन्तोष सेनको चलचित्र ‘बलिदान’मा व्यस्त छन् ।

त्यस्तै अर्का अभिनेता विपीन कार्की पनि ५० लाख पारिश्रमिक लिने अभिनेताको सूचीमा पर्छन् । उनलाई चलचित्र ‘तेलभिसा’ मा ५० लाख दिइएको कुरा ऋचा घिमिरे स्वयंले एक टीभी अन्तर्वार्तामा बताएकी छन् ।

त्यस्तै भर्खरैमात्र ‘छक्का पञ्जा’ टीमदेखि बाहिरको ब्रान्डमा पनि काम गर्ने निर्णय गरेका चर्चित हाँस्य अभिनेता केदारप्रसाद घिमिरे माग्ने बुढा पनि ५० लाखको सूचीमा अटाएका छन् । बुझिएअनुसार उनी ५० लाख घटीमा काम गर्दैनन् र उस्तै परे ६० लाखसम्म लिन्छन् ।

यसरी कलाकारहरुको भटाभट पारिश्रमिक बढिरहँदा, भर्खरैमात्र ब्लकबस्टर भएको चलचित्र ‘पूर्णबहादुरको सारङ्गी’का अभिनेता विजय बरालको पारिश्रमिक कति पुग्यो होला ? नेपाली बक्स अफिसको सबै रेकर्ड तोड्दै ‘अलटाइम रेकर्ड ब्रेकिङ’ घोषित भएको चलचित्रका सुपरहिट अभिनेताले आगामी चलचित्रहरुमा कति पारिश्रमिक डिमान्ड गर्छन् होला त ?

नाटकबाट उदाएका विजय सधैं आफ्नो सहायक भूमिकाका कारण चिनिँदै आएका थिए । ‘पूर्णबहादुरको सारङ्गी’ विजयले लिड रोल निर्वाह गरेको पहिलो चलचित्र हो । पहिलो चलचित्रले नै उनलाई सुपरहिट बनाइदियो । उनको अभिनयको चौतर्फी चर्चा भयो । चलचित्रले अहिलेसम्म विश्वव्यापी रूपमा ७२ करोड ६० लाखको ग्रस कलेक्सन गरेको छ । पहिलो लिड रोल भएको चलचित्र नै ब्लकबस्टर भएका बराल यतिबेला स्क्रिप्ट पढ्नमा व्यस्त छन् ।

मंगलबार राजधानीमा भएको ‘हरि हजुरबा’ नाटक मञ्चनपछि भएको प्रेस मिटमा बोल्दै उनले आफूले स्क्रिप्टसम्म पढ्न नभ्याएको बताएका छन् ।

उनले भनेका छन्, ‘स्क्रिप्ट पढ्नै पाएको छैन । जसको पढिरहेको छु, उहाँहरुसँग कुरा भइरहेको छ ।’

चलचित्रमा फड्को मारे पनि विजयले अहिलेसम्म नाटक भने छाडेका छैनन् । नाटकको पारिश्रमिक खुलाउँदै उनले सुनाए, ‘नाटकबाट एउटा सीमित पारिश्रमिक हुन्छ । धेरै हुँदैन । खाजा खाने पैसा आउँछ । धेरैमा २५ देखि ४० हजारसम्म आउला । त्यो हाम्रो चिया खर्च हो ।’

‘पूर्णबहादुरको सारङ्गी’पछि तपाईंको रेट ३० देखि ४० लाख पुग्यो रे भन्ने पत्रकारको प्रश्नमा उनले सुनाए, ‘चलचित्रको कुरामा मेरो पारिश्रमिक ३०-४० लाख भयो भन्ने हल्ला होला, तर यसबारे मैले अहिलेसम्म कहीँकतै केही बोलेको छैन । कसैले आफैं लेख्दिनुहुन्छ भने त्यो मायाले लेख्दिनु भएको हो । यो भनेको अहिले चलचित्रले यत्रो कमायो, विजयलाई अलिकति दिनुपर्छ भन्ने खालका आएका हल्लाहरु जस्तै हो ।’

त्यसो भए अब चलचित्रमा तपाईंको डिमान्ड कति हो त भन्ने प्रश्नमा उनले थपे, ‘पहिला स्क्रिप्ट पढौं । डिमान्ड गर्ने त्यसपछिको कुरा हो । त्यही पनि मेरो धेरै डिमान्ड भन्ने कुरै छैन । ठिक्क मिलाएर लिने हो । इच्छा त हुन्छ, मेरो कामको यति पैसा आओस् भन्ने, तर ठ्याक्कै यति नै डिमान्ड भन्ने छैन ।’