पालिका हाँकेकी मञ्जुलाई पार्टी हाँक्ने अवसर

 डोटी । डोटीमा मङ्गलवार सम्पन्न भएको नेकपा एमालेको नवौँ जिल्ला अधिवेशनले आगामी तीन वर्षका लागि नयाँ कमिटी चयन गरेको छ । नयाँ कमिटीको नेतृत्व मञ्जु मलासीले गर्दै छन् । हक्की स्वभावकी जुझारु नेतृका रुपमा आफ्नो पहिचान बनाएकी मलासी आफू २०४६ सालदेखि राजनीतिमा लागेको बताउँछिन् । २०६२\०६३ सालको जनआन्दोलनमा अग्रमोर्चामा रहेकी मलासी एमालेको पाँचौँ अधिवेशनदेखि लगातार जिल्ला कमिटीमा रहँदै आएकी छन् ।

 सातौँ अधिवेशनमा जिल्ला उपसचिव भएकी उनी आठौँ अधिवेशनबाट जिल्लाको उपाध्यक्ष भएकी थिइन् । २०६४ सालको संविधान सभाको निर्वाचनमा एमालेबाट समानुपातिकतर्फकी उम्मेदवार बनेकी मलासी २०७४ साल असार १४ गते सम्पन्न स्थानीय तहको निर्वाचनमा दिपायल सिलगढी नगरपालिकाकी नगर प्रमुखमा निर्वाचित भइन् ।

पाँच बर्ष सफलतापूर्वक नगरपालिकाको नेतृत्व सम्हालेकी मलासीले नगर प्रमुखमा दोहोरिने इच्छा व्यक्त गरेकी थिइन् । तर, उनलाई पार्टीले टिकट दिएन । तिनै मलासीलाई एमालेले जिल्लाभरिको नेतृत्व हाँक्ने जिम्मेवारी दिएको छ । जिम्मेवारी पाए सफलतापूर्वक सम्पन्न गर्ने बताउँदै आएकी मलासी अबको तीन बर्ष एमाले डोटीको बागडोर सम्हाल्ने छिन् ।

 मलासीका लागि यो तीन बर्से कार्यकाल सहज भने छैन । २०७४ सालमा जिल्लाका नौ स्थानीय तहमध्ये पाँचमा प्रमुख र उपप्रमुख दुवै र एकमा उपाध्यक्ष एमालेले जितेको थियो । जिल्लाका ६५ वडामध्ये एमालेसँग २९ वडा थिए । तर, २०७९ को स्थानीय तहको चुनावमा एमालेले एउटा पालिकाका अध्यक्ष उपाध्यक्ष र १८ वडाध्यक्ष मात्रै जितेको छ । मलासीको तिन बर्से कार्यकालभित्रै स्थानीय तह र प्रतिनिधि सभा तथा प्रदेश सभा निर्वाचन हुनेछ । निर्वाचनमा सन्तोषजनक परिणाम हात पार्न उनले अहिले देखिनै सङ्घर्ष गर्नु पर्नेछ ।

यस्तो अवस्थामा एमालेको नारा “मिसन–०८४” सफल बनाउनु मलासीका लागि चुनौतीपूर्ण हुनेछ । यस्तै, आन्तरिक विवादका कारण गुटैगुटमा विभाजित एमालेलाई एकढिक्का बनाएर सङ्गठन चलायमान बनाउनु पनि मलासीको अर्को परीक्षा हुनेछ ।

 त्यसो त मलासीले करिब ६ महिना एमाले डोटीको नेतृत्व गरि पनि सकेकी छन् । नवौँ अधिवेशन गत चैत्रमा हुनु पर्ने थियो तर अधिवेशन प्रतिनिधिको विवादले तोकिएको समयमा अधिवेशन हुन सकेन । त्यसपछि एमालेले उनलाई जिल्ला सङ्गठन कमिटीको अध्यक्षको जिम्मेवारी दिएको थियो । नेता कार्यकर्ताहरूलाई एकढिक्का बनाएर लैजाने आत्मविश्वास भने छ मलासीलाई । यदि जिल्लाका सबै नेता कार्यकर्ताहरूलाई विश्वासमा लिएर अघि बढ्न सकेको खण्डमा उनले जस पाउनेछन् ।