एयरपाेर्ट नजिकैबाट ६८ लाख हुन्डी रकमसहित चार जना पक्राउ

काठमाडौं । प्रहरीले ६८ लाख रुपैयाँ हुन्डीको रकम र चेकसहित चार जनालाई नियन्त्रणमा लिएको छ ।

विशेष सूचनाको आधारमा मंगलबार राति पौने १२ बजे राति काठमाडौंको एयरपोर्ट शम्भुमार्ग स्थित सडक खण्डमा हुन्डीको रकमसहित ४ जनालाई पक्राउ गरेको हो ।

अवैध रुपमा हुण्डी कारोबार भइरहेको सुचनाको आधारमा प्रहरी वृत्त गौशालाबाट खटिएको प्रहरी टोलीले शंका लागेर सोही स्थानमा रोकी राखेको प्रदेश ३-०१-०२२ च १९७२ नम्बरको सेतो रङको हुन्डाई कम्पनीको क्रेटा कार चेकजाँच गर्ने क्रममा चार जनालाई पक्राउ गरिएको काठमाडौं जिल्ला प्रहरी परिसरले जनाएको छ ।

पक्राउ पर्नेमा काठमाडौं महानगरपालिका –३२ दोभानपुल घर भएका ४६ वर्षीय राज कुमार माली, काठमाडौं महानगरपालिका – १० नयाँ बानेश्वर घर भएका १८ वर्षीय आवाद सिंह, झापा विर्तामोड घर भएका २७ वर्षीय युवराज सुवेदी र झापा अर्जुनधारा नगरपालिका –७ घर भई हाल काठमाडौं बस्ने ३२ वर्षीय प्रवेश कुमार पौडेल रहेका छन् ।

उनीहरुको साथबाट नेपाली नगद ६८ लाख रुपैंया र रकम उल्लेख गरिएका ५ थान चेकसहित फेला परेको थियो । उनीहरुविरुद्ध मुलुकी अपराध संहिता २०७४ संसोधित १२५(क) बमोजिम हुण्डी सम्बन्धी कारोबार गर्न नहुने कसूरमा प्रहरी वृत्त गौशालाबाट थप अनुसन्धान भइरहेको छ ।