सुदूरपश्चिमका मुख्यमन्त्रीको राजनीतिक सल्लाहकारमा डा. उपाध्याय नियुक्त

कैलाली । सुदूरपश्चिम प्रदेशका मुख्यमन्त्री कमल बहादुर शाहको राजनीतिक सल्लाहकारमा डा. जितेन्द्र उपाध्याय नियुक्त भएका छन् ।

मुख्यमन्त्री शाहले सुदूरपश्चिम प्रदेशका मुख्यमन्त्रीको सल्लाहकार नियुक्ति तथा सेवा र सुविधा सम्बन्धी कार्यविधि २०८१ अनुसार उपाध्यायलाई राजनीतिक सल्लाहकारमा नियुक्त गरेका हुन् ।

युवा वैज्ञानिक उपाध्याय पछिल्लो समय क्यानडामा अध्यापन पेशामा थिए । विश्वकै प्रतिष्ठित विश्वविद्यालय क्यानडाको म्याकगिल विश्वविद्यालयमा अध्यापन गराउने उनी नेपाल फर्किएसँगै मुख्यमन्त्री शाहले राजनीतिक सल्लाहकार नियुक्त गरेका हुन् ।

दक्षिण कोरियाको चोनबुक नेशनल युनिभर्सिटीबाट फूड साइन्स र टेक्नोलोजीमा पिएचडी गरेका उपाध्यायका झन्डै दुई दर्जन अनुसन्धानमूलक जर्नलहरू प्रकाशित भएका छन् ।

मुख्यमन्त्री शाहको राजनीतिक सल्लाहकार नियुक्त उपाध्यायले यसअघि काठमाडौं विश्वविद्यालय र नेपाल एकेडेमी अफ साइन्स टेक्नोलोजी ९नास्ट० सहित विश्वका विभिन्न देशमा अध्यापन र अनुसन्धानको क्षेत्रमा काम गरिसकेका छन् । प्रवासमा रहेर अध्ययन, अध्यापन र अनुसन्धान सँगसँगै सामाजिक र राजनीतिमा पनि उत्तिकै क्रियाशील डा उपाध्याय युवा अभियानका क्षेत्रमा पनि लामो समयदेखि क्रियाशील छन् ।

नेपाल जेसीजबाट “द आउटस्ट्यान्डिङ युथ अफ नेशनल अवार्ड २०२१”, ग्लोबल युथ पिस कन्फरेन्समा “युवा प्रेरणा अवार्ड २०१८”, कोरियाका लागि प्रचार दूत सहित प्रतिष्ठित सम्मान पाएका छन् । नेपालका राष्ट्रपतिबाट सरकारी छात्रवृत्ति र शैक्षिक उपलब्धि पदक नेपाल विद्याभूषण “क” बाट पनि उनी विभूषित भइसकेका छन् ।

उनी कैलाली टिकापुरका हुन् ।