निसमको आक्रमणमा घाइते बन्दै घर फर्कियो कर्णाली

काठमाडौं । नेपाल प्रिमियर लिगको पहिलो संस्करणमा कर्णाली याक्सको यात्रा दोस्रो प्लेअफसम्म पुगेर टुंगिएको छ । प्रतियोगिता सुरु हुनु अघि यो टिमलाई उपाधिको एक दावेदारका रुपमा हेरिएको थियो ।

भारतीय दिग्गज ब्याटर शिखर धवनलाई भित्र्याएर एनपीएलकै हाइप बढाएको कर्णालीले प्रतियोगिताभरि सोचेजस्तो प्रदर्शन गर्न सकेन ।

धवनले चार म्याच खेल्दा दुईवटामा चलेनन् । धवन गएपश्चात पछि टिमसँग ब्याटिङपंति बलियो नै थियो । बलिङ युनिट पनि कमजोर थिएन । तर, फाइनलको नजिक आइपुग्दा जनकपुर बोल्ट्सका जिम्मी निसमको ब्याट कर्णालीलाई भारी पर्न गयो ।

त्रिविको स्लो पिचमा पहिले ब्याटिङ गर्दै कर्णालीले ११८ रन मात्रै जोड्न सक्यो । चारै विदेशी ब्याटरहरु जयकिसन कोल्सावाला, जिसन मक्सुद, विलियम बोसिस्टो, चन्डविक वाल्टन एकैपटक फ्पल हुँदा कर्णाली बलियो स्कोर बनाउन चुक्यो । नेपाली ब्याटर देव खनाल र गुल्शन झाले सामान्य योगफलसम्म पुर्याएका थिए ।

११९ रनको लक्ष्य टि २० मा झिनो मानिन्छ । तर, जनकपुरले सुरुमै भटाभट विकेट गुमाएपछि खेल रोमाञ्चक बन्न पुग्यो । अन्तिम चार ओभर बाँकी हुँदासम्म खेल कतापट्टि जाला भन्न सकिने अवस्था थिएन । जनकपुरका तल्लो क्रमका ब्याटर धैर्यता देखाए र कर्णालीले फिल्डिङमा गरेको केही त्रुटिले पनि उनीहरुलाई सहयोग मिल्यो ।

बल र ब्याटको रोचक संघर्ष देखिएको खलमा नायक भने न्युजिल्यान्डका ब्याटर निसम नै सावित भए । १० ओभरमा ४१ रन जोड्दा ४ विकेट गुमाएको दवावपूर्ण स्थितिमा क्रिजमा आएका थिए निसम । आएदेखि नै उनले कर्णालीका बलरहरुमाथि कडा प्रत्याक्रमण गरे । अन्य ब्याटरहरुले प्रतिबल रन बनाउन पनि संघर्ष गरिरहँदा उनले २६४.७० को विष्फोटक रेटमा ब्याट चलाएका थिए ।

११ औं ओभरमा बोसिस्टोलाई दुई छक्का हान्दै आफ्नो नियत स्पष्ट पारेका थिए निसमले । तर, सोही ओभरमा हर्ष ठाकर रन आउट भएपछि खेल रोमाञ्चक बनेको थियो । तर, निसमले एक्लै टिमलाई अघि बढाए । १५ औं ओभरमा सोमपाल कामीलाई पनि दुई छक्का हानेपछि जनकपुर जितको संघारमा देखियो । अन्तिम पाँच ओभरमा जनकपुरलाई ३० बलमा ३० रन आवश्यक थियो ।

१६ औं ओभरमा सोमपालले बल दिए १६ वर्षिय स्पिनर विपिन शर्मालाई । शर्मालाई दोस्रो बलमा निसमले चौका हाने । तर, तेस्रो बलमा विपिनले निसमलाई बोल्ड गर्दै कर्णालीलाई खेलमा फर्काए । जनकपुरलाई जितसम्म डोहोर्याउने इरादा बोकेका निसम स्तब्ध बनेर भुईंमा घोप्टिएका थिए ।

विपिन यतिमा रोकिएनन् । सोही ओभरको अन्तिम बलमा उनले मोहम्मद मोसिनलाई एलबीडब्लु धरापमा पारे । अब खेल कर्णालीपट्टि ढल्किएको प्रतित भयो । सात विकेट गुमाएको जनकपुरसँग कहलिएका ब्याटर थिएनन् भने लक्ष्य अझै २३ रन पर थियो ।

शेर मल्लले १७ औं र १८ ओभर धैर्यतापूर्वक एक–एक रन बटुल्दै बसे । जनकपुरलाई अन्तिम १२ बलमा १४ रन चाहियो भने कर्णालाई तीन विकेट । १९ औं ओभरमा शेर मल्लले उत्कृष्ट बलिङ गरिरहेका नन्दन यादवलाई निर्णायक छक्का प्रहार गरे । यही छक्काले खेल कर्णालीको पकडमा पुग्यो । यद्यपि जितका लागि ४ रन मात्रै बाँकी छँदा मयन यादव रनआउट भए र फेरि जनकपुरको फ्यानको धड्कन बढ्यो । तर, शेर मल्लले बाँकी दुई बलमा २–२ रन जो्ड्दै खेललाई अन्तिम ओभरमा पुग्न दिएनन् ।

१७ बलमा ५ छक्का र २ चाैकासहित ४५ रन बनाएका र २ विकेट समेत लिएका निसम निर्विकल्प प्लेयर अफ दि म्याच बने । यो जितले जनकपुर बोल्ट्स र सुदूरपश्चिमबीच मुख रसाउने अन्तिम भिडन्त सुनिश्चित गरेको छ । कर्णाली घर फर्किएको छ ।