रविबारे गगन- न्यायिक निरुपणलाई प्रभावित पार्नसक्छ, अदालतमा भएको विषयमा बोल्दिनँ (भिडिओ)

काठमाडौं । नेपाली कांग्रेसका महामन्त्री गगन थापाले एमाले अध्यक्ष केपी शर्मा ओली नेतृत्वको सरकारले अपेक्षाअनुसार काम गर्न नसकेको टिप्पणी गरेका छन् ।

कैलाश कोइरालाको उपन्यास शास्त्रको सार्वजनिकीकरण कार्यक्रमबाट बाहिरिने क्रममा सञ्चारकर्मीहरुसँग कुरा गर्दै सरकारले अपेक्षा अनुरुप काम गर्न नसकेको विषयमा प्रधानमन्त्री ओली पनि सचेत रहेको बताए ।

उनले भने, ‘सरकार राम्रोसँग चलिरहेको छ, सरकार बनिसकेपछि जुन आशा थियो, त्यो अनुसार डेलिभरी भइरहेको छै्रन । सरकारको अहिले कुनै फेरबदलको सम्भावना छैन । तर डेलिभरी गर्न सकिरहेको छैन । यो विषयमा सबैभन्दा बढी सचेत प्रधानमन्त्री आफै रहनुपर्छ । उहाँ हुनुहुन्छ । सरकारले काम गर्न नसकेको विषयमा मलाई जस्तै उहाँलाई पनि लागेको हुनुपर्छ । अहिले सरकार पनि चेन्ज हुँदैन, मन्त्रिमण्डल पनि फेरबदल हुँदैन ।’

उनले अदालतमा भएको रास्वपा सभापति रवि लामिछानेको बिषयमा आफू नबोल्ने बताए ।

रविबारे सोधिएको प्रश्नमा उनले भने, ‘अहिले अदालतमा भएको विषयमा, तपाईंको च्यानलमा वा सडकमा कतै गएर मैले बोल्ने वा टिप्पणी गर्ने कुरा न्यायिक निरुपणलाई प्रभावित गर्ने कुरा हुन्छ । तपाईंले मलाई ५० पटक सोध्नुभयो भने पनि मैले ५० पटक दिने उत्तर यस्तै हुन्छ ।’