प्रधानमन्त्री हुँदा राष्ट्रिय मानक बन्नेगरी काम गर्ने जमर्को गरें: प्रचण्ड

काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले आफू तेस्रो पटक प्रधानमन्त्री हुँदा राष्ट्रिय मानक बन्नेगरी काम गरेको दाबी गरेका छन् ।

गोरखा-ताकुकोट सेवा समाज काठमाडौंको साधारणसभालाई सम्बोधन गर्दै उनले भ्रष्टाचारविरोधी अभियानदेखि देशको अर्थतन्त्र लयमा फर्काउन आफू प्रधानमन्त्री हुँदा धेरै मेहनत गरेको बताए ।

उनले भने, ‘म गोरखाबाट निर्वाचित भएर प्रधानमन्त्री भएपछि मैले केही राष्ट्रिय मानकहरु बनाउने जमर्को गरें, सुशासनको पक्षमा र भ्रष्टाचारको विरुद्ध सामाजिक न्यायको पक्षमा, गम्भीर आर्थिक संकटमा रहेको देशलाई विस्तारै लयमा फर्काउने र राष्ट्रिय र अन्तर्राष्ट्रिय रुपमा देशको प्रतिष्ठा र हितको निम्ति वातावरण बनाउन धेरै मेहनत गरें । म प्रधानमन्त्री भएपछि गोरखावासीको अपेक्षाअनुसार काम गर्न केही कमी भएको महसुस भएकै थियो, तर मैले देशको प्रतिष्ठा बढाउने धेरै काम गरिरहेको थिएँ । अहिले मैले फेरि अवसर पाएको छु ।’

उनले गोरखाको विकासको लागि आफूले काम गरिरहेको बताए ।

प्रचण्डले थपे, ‘जडिबुटी प्रशोधन, रुग्ण उद्योग सञ्चालन, बुढीगण्डकी परियोजना अगाडि बढाउने, गोरखकाली रबर उद्योग सञ्चालन गर्ने सबै विषयमा म प्रधानमन्त्री हुँदा महत्वपूर्ण निर्णय गरेको छु, तर अहिलेको सरकारले त्यसलाई अगाडि बढाउनेभन्दा पनि निजीकरण गर्न खोज्दैछ ।’