सिटीको ओरालो यात्रा, एस्टन भिल्लासँग पराजित

हेटौंडा । इङलिस प्रिमियर लिगको दशौं चरणपछि खराब खेल पस्केको डिफेन्डिङ च्याम्पियन म्यान्चेस्टर सिटीले शनिबारको पहिलो खेलमा एस्टन भिल्लासँग हार व्यहोरेको छ ।

भिल्लाको घरेलु मैदान भिल्ला पार्कमा भएको खेलमा सिटी २-१ ले पराजित भएको हो । पराजित भएसँगै सिटीलाई यो वर्ष उपाधि रक्षा गर्न अब निकै ठूलो संघर्षमात्र गर्नुपर्ने छैन, लिभरपुल, चेल्सी र आर्सनल जस्ता ठूला टीमहरुको नतिजामा पनि भर पर्नुपर्ने भएको छ ।

शनिबारको खेलमा भिल्लाले १६औं मिनेटमा आक्रमण गर्दै सिटीलाई १-० ले पछि पारेको थियो । जोन डुरेनले गोल गर्दै भिल्लालाई पहिलो सफलता दिलाएका थिए ।

पहिलो हाफमा १-० ले पछि परेको सिटीलाई दोस्रो झट्का खेलको दोस्रो हाफमा लाग्यो । भिल्लाको लागि मोर्गेन रोग्रेसले गोल गरेपछि २-० को अग्रता मिल्यो ।

सिटीले खेलको इन्जुरी समयमा फोडेनमार्फत गोल गरे पनि त्यो जितको लागि पर्याप्त बनेन र खेल भिल्लाले जित्यो ।

जितपछि सिटीलाई पछि पार्दै भिल्ला १७ खेलबाट २८ अङ्कको साथ पाँचौं स्थानमा उक्लँदा समान खेलबाट सिटी २७ अङ्कसहित छैटौं स्थानमा झरेको छ । सिटीभन्दा दुई खेल कम खेलेको लिभरपुल ३६ अङ्कसहित पहिलो स्थानमा छ ।