अखिल क्रान्तिकारीको नेतृत्व चयनको लागि दुई चरणमा निर्वाचन हुने, कहिलेबाट अघि बढ्छ प्रक्रिया ?

काठमाडौं । नेकपा माओवादी केन्द्रनिकट विद्यार्थी संगठन अखिल क्रान्तिकारीको नेतृत्व चयनको लागि दुई चरणमा निर्वाचन हुने भएको छ। पहिलो चरणमा उमेर हदबारे निर्वाचनबाट छिनोफानो भइसकेपछि मात्रै नेतृत्व चयनको लागि चुनाव गर्ने तयारी गरेको हो।

असोज १०–१५ सम्म भएको सम्मेलनमा उमेर हदको विवादले उग्र रुप लिएपछि स्थगित भएको थियो। तर, उमेर हदबारे निर्वाचनपछि मापदण्ड टुंगिएपछि मात्रै नेतृत्व चयनको कार्यसूची अघि बढ्ने अखिल क्रान्तिकारीका इन्चार्ज हिमाल शर्माले बताए।

उनले भने, ‘पहिला ३२ वर्षे उमेर हद लगाउने कि नलगाउने भन्नेमा पहिलो चरणमा निर्वाचन हुन्छ। सम्मेलन भएजस्तो अब सबैलाई काठमाडौं बोलाएर हुँदैन। उमेर हदबारेको निर्वाचनमा जिल्ला जिल्लामै हुन्छ।’

उनले उमेर हदको ९६ मतदान केन्द्र राख्ने तयारी भइरहेको बताए। उनले थपे, ‘उमेर हदबारे टुंगो लागेपछि त्यही मोडालिटी अनुसार नेतृत्व छनोटको लागि निर्वाचन प्रक्रिया अघि बढ्छ। नेतृत्व छनोटका लागि भने प्रदेश प्रदेशमा निर्वाचन हुन्छ।’

उनले निर्वाचन आयोगले एक दुई दिनभित्रै कार्यतालिका सार्वजनिक गर्नेगरी तयारी गरिरहेको बताए। असोज १०–१५ भएको सम्मेलन भाँडिएपछि मंसिर २३ र २४ का लागि तोकिएको थियो। तर, पार्टीले हस्तक्षेप गरेर तत्काललाई सम्मेलन स्थगित गरेर उमेर हद र प्रतिनिधिबारे पहिला टुंग्याउने निर्देशन दिएको थियो।

अहिले नेतृत्वका लागि दीपेश पुन, मदन भुल, पवन कार्की, केशव रावल, नरेश रेग्मी, जीपी मैनालीलगायतको दाबी छ। तर, पार्टी नेतृत्वको आकांक्षा राखेझैं ३२ वर्षे उमेर हद लागू भए अहिले नेतृत्वको दौडमा रहेका अधिकांश बाहिरिनेछन्।