कार्यकर्तालाई नेता सिंहको आग्रह- आर्थिक समृद्धिका लागि कांग्रेस सक्षम छ, उच्च मनोबल राख्नुस्

काठमाडौं । उपप्रधान एवम् शहरी विकासमन्त्री प्रकाशमान सिंहले राजनीतिक परिवर्तन जस्तै आर्थिक समृद्धिका लागि पनि कांग्रेस पार्टी सक्षम रहेको दाबी गरेका छन् ।

कांग्रेस पूर्वमहामन्त्रीसमेत रहेका सिंहले कांग्रेस रूपन्देहीले मंगलबार आयोजना गरेको कार्यकर्ता भेटघाट कार्यक्रमलाई सम्बोधन गर्दै राजनीतिक परिवर्तनसँगै आर्थिक समृद्धिको नेतृत्व गर्न पनि कांग्रेसले क्षमता राख्ने बताए ।

उनले भने, ‘जसरी राजनीतिक अधिकार गुमेको बेलामा कांग्रेसले जनतालाई सार्वभौमसत्ता सम्पन्न बनाउन पोलिटिकल लिडरसिप लियो, आर्थिक समृद्धिका लागि पनि कांग्रेस पार्टी नै सक्षम छ, तर त्यसका लागि कांग्रेसलाई सांगठनिक रूपमा सशक्त र व्यवस्थित बनाउनुपर्छ ।’

जनताले चाहेको जीवन र जीविकोपार्जन सहज होस् भन्ने सपना कांग्रेसलाई व्यवस्थित गर्‍यौं भने पूरा गर्नसक्ने उपप्रधानमन्त्री सिंहले बताए ।

कांग्रेसभित्र लोकतान्त्रिक राजनीतिक संस्कार विकास गर्नुपर्नेमा जोड दिँदै उनले कार्यकर्ताको मनोबल उठाउनुपर्ने बताए । पार्टीका कारण भएका उपलब्धिबारे नागरिकलाई जानकारी गराउन पनि स्थानीय पार्टी नेतृत्वलाई उनले आग्रह गरे ।

सिंहले रूपन्देहीमा रहँदा शहरी विकास मन्त्रालयअन्तर्गत सञ्चालित योजनाहरूको अवलोकन पनि गरेका छन् ।