बागमती प्रदेश लिग : अंकितको ह्याट्रिकमा काठमाडौं विजयी

हेटौंडा । दोश्रो संकरणको बागमती प्रदेश फुटबल लिगको उद्घाटन खेलमा चित्लाङ्ग एफसी काठमाडौंले विजयी सुरुवात गरेको छ । हेटौंडाको पिप्ले–क्याम्पा रंगशालामा भएको उद्घाटन खेलमा काठमाडौंले माउन्ट एभरेस्ट एफसी काभ्रेलाई ३–० ले पराजित गरेको हो ।

समूह ए को पहिलो खेलमा काठमाडौलाई सहज जित दिलाउन अंकित रास्कोटी ह्याट्रिक गरे । उनले खेलको ६,२० र ७९ मिनेटमा गोल गर्दै आफ्नो ह्याट्रिक पूरा गरे ।खेलमा रास्कोटिनै म्यान अफ द म्याच समेत भए ।

बागमतीका ११ जिल्लाको सहभागिता रहेको लिगमा भोलि दुईवटा प्रतिस्पर्धा हुने म्याच कमिसर छवि सुवेदीले बताए । भोलि दोलखा र नुवाकोटको पहिलो खेल हुनेछ भने दोश्रो खेल भक्तपुर र सिन्धुलीबीच हुनेछ ।

लिगकम नकआउट अवधारणामा हुने प्रतियोगिताको फाईनलिस्ट दुईवटा टिमले एन्फाले आयोजना गर्ने राष्ट्रिय फुटबल लिगमा सहभागिता जनाउने संघका कार्यबाहक अध्यक्ष राजिव बस्नेतले बताए ।

प्रतियोगितामा विजेता तथा उपविजेताले नगद २ लाख र एक लाख शिल्ड तथा प्रमाणपत्र प्राप्त गर्नेछन् ।

लिगमा यो वर्ष मकवानपुरबाट पदमपोखरी युवा क्लब, बिएफसी चितवन, धुनिवेशी युथ समाज धादिङ, बट्टर युथ क्लब नुवाकोट, चित्लाङ फुटबल क्लब काठमाडौ, थिमी युथ क्लब भक्तपुर, माउन्ट एभरेस्ट एफसी काभ्रे, चौतरा स्पोर्टिङ सिन्धुपाल्चोक, टाइगर टिम दोलखा, ब्लु अल्पाइन सिन्धुली र ललितपुरको क्लबहरु सहभागी छन् ।