बुटवलमा एलिनालाई ‘वान्स मोर’ को हुटिङ

रुपन्देही । बुटवलमा सञ्चालित औद्योगिक व्यापार मेलामा भरिभराउ दर्शकका बीच बहुचर्चित गायिका एलिना चौहानको दमदार प्रस्तुती रह्यो । क्रिसमसको बिदा पनि भएकाले बुधबार मेलामा दर्शक खचाखच भरिएका थिए । उद्घोषकले मञ्चमा एलिनाको नाम उच्चारण गरेसंगै दर्शक दीर्घाबाट हुटिङको वर्षा भयो । जब एलिनाले माइक समातेर शब्द उच्चारण गरिन्, दर्शकको हुटिङको माहौल अझै बढ्यो ।

एलिनाले हजारौं दर्शकका बीच आफ्नो गायन करियर सुरु गर्दादेखिका पछिल्ला सबै गीत गाएर भरपुर मनोरञ्जन प्रदान गरिन् । एलिनाले गीत गाउँदा दर्शकले पनि संगसंगै गीत गाउदै हुटिङ गर्दै नाचेका थिए । बुटवलको मञ्चमा एलिनाले कट्टा हान्दिन्छु, धोकेवाज हौ तिमी, मिनरल वाटर, आइफोन हरायो लगायतका थुप्रै गीत गाएर दर्शकलाई भरपुर मनोरञ्जन गराएकी थिइन् । उनलाई दर्शकहरुले प्रस्तुतीसँगै वान्स मोर वान्स मोरको हुटिङ गरिरहेका देखिन्थे ।

बुधबार एलिनसहित लोक तथा दोहोरी गायक कृष्ण रेउले, नारायण विपि परियार, सुशिला गौतम, धनबहादुर गुरुङ, शिला गुरुङ, तारा थापा, दिपा थापा लगायतका कलाकारहरुको प्रस्तुती रहेको थियो ।

त्यस्तैगरी भोली बिहिबार लोक तथा दोहोरी गायक श्याम राना, सपना गाहा, विधान कार्की, सुनि तामी, निरु गुरुङ, हरि खत्री, हाँस्य कलाकार कमल गाउँले, डान्सर विना धिताल, शिल्पा मगर लगायतका कलाकारहरुको प्रस्तुती रहने सांस्कृतिक कार्यक्रम संयोजक निर्मित कसजूले बताए ।

बुधबार मेलामा ४० हजारभन्दा बढी दर्शकले अवलोकन गरेको मेला कार्यसम्पादन समितिका सदस्य सचिव मुक्तिप्रसाद अधिकारीले दाबी गरे ।

पुसको ३ गतेदेखि सुरु भएको औद्योगिक व्यापार मेला १८ गतेसम्म सञ्चालन हुने छ । ‘लगानी लुम्बिनीमा, समृद्धि देशमा’ भन्ने मूल नारासहित आयोजना गरिएको मेलामा ५ सय स्टल सहभागी छन् ।

मेलामा औद्योगिक प्रदर्शनी, हस्तकला प्रदर्शनी, कृषि प्रदर्शनी र प्रविधिको प्रदर्शनी तथा बिक्री वितरण, विभिन्न विधामा प्रतियोगितात्मक कार्यक्रमसहित सांस्कृतिक सांगीतिक कार्यक्रम भइरहेको मेला कार्यसम्पादन समितिका सदस्य तथा प्रचार प्रसार उपसमितिका संयोजक दीपक चापागाईले जनाए ।