कोहलीको अशोभनीय हर्कतः अष्ट्रेलियाका १९ वर्षिय ओपनरलाई पीचमै आएर दिए धक्का

काठमाडौं । भारतीय ब्याटर विराट कोहली अष्ट्रेलियाका युवा खेलाडीलाई मैदानमै दुर्व्यवहार गरेका छन् । अहिले जारी अष्ट्रेलिया र भारतबीचको चौंथो टेस्ट म्याचका क्रममा सो घटना भएको हो ।

मेलबर्न क्रिकेट ग्राउन्डमा भएको खेलमा अष्ट्रेलियाले टस जितेर ब्याटिङ रोजेको थियो । अष्ट्रेलियाबाट १९ वर्षिय साम कोन्स्टासले टेस्ट डेब्यू गरेका थिए ओपनरका रुपमा । कोन्स्टासले पहिलो म्याचमा आक्रामक शैलीमा ब्याटिङ गरेर भारतलाई दवावमा पारे । उनी ६५ बलमा ६० रन बनाएर आउट भए ।

खेलको १० औं ओभर सकिएपश्चात कोहली र कोन्स्टास आमनेसामने भएका थिए । कोन्स्टास आफ्नै सुरमा पीचको अर्को इन्डतर्फ जाँदै थिए । कोहलीले भुईंबाट बल टिपेर उत्तेजित मुद्रामा कोन्स्टास हिँडिरहेको बाटोमा आएर कुममा धक्का दिए ।

कोन्स्टासले पछाडि फर्किएर कोहलीलाई केही भनेको र त्यसपछि कोहली उल्टै जंगिएको लाइभमा देखिएको थियो । अष्ट्रेलियाका अर्का ओपनर उस्मान ख्वाज र म्याच अम्पायरले हस्तक्षेप गरेर विवाद चर्किन दिएनन् ।

यस लगत्तैको ओभरमा कोन्स्टासले भारतीय फास्ट बलर जसप्रिम बुमराहलाई छक्का र चौका वर्षाउँदै १८ रन जोडे । उनले ५२ बलमा अर्धसतक पुरा गरेका थिए ।

कोहलीले एक युवा खेलाडीप्रति देखाएको व्यवहारलाई लिएर सामाजिक सञ्जालमा चर्को आलोचना भइरहेको छ । यस सिरिजमा कोहलीले गतिलो प्रदर्शन गर्न सकेका छैनन् । उनले एक सतक बनाए पनि बाँकी ५ इनिङमा पुरै फ्लप भएका छन् ।

यसअघि तेस्रो टेस्टमा भारतीय बलर मोहम्मद सिराजले अष्ट्रेलियन ब्याटर ट्राभिस हेडमाथि यस्तै हर्कत गरेका थिए । उनलाई आइसीसीले दण्डित समेत गरेको थियो । कोहलीलाई पनि दण्डित गर्नुपर्ने माग भइरहेको छ ।