सर्वोच्च बारको निर्वाचनमा एमाले–माओवादी गठबन्धन, कांग्रेसलाई नेकपा एसको साथ

काठमाडौं । सर्बोच्च बारको निर्वाचनमा एमाले र माओवादी आबद्ध वकिलहरुबीच गठबन्धन भएको छ । नेपाल पत्रकार महासंघको निर्वाचनभन्दा ठिक विपरित वकिलहरुको निर्वाचनमा भने कांग्रेस र एकीकृत समाजवादीको गठबन्धन भएको छ ।

आगामी पुस २० गते हुने सर्वोच्च बार एशोसियसनको निर्वाचनमा एमालेनिकट प्रगतिशील कानून व्यवसायी संघको तर्फबाट अध्यक्षमा महेश थापा उम्मेदवार छन् ।

उनलाई समर्थन जनाउँदै माओवादीनिकट आरपिएलएको तर्फबाट सचिवमा प्रभाकर श्रेष्ठ उम्मेदवार तय भएका छन् । यसअघि एमालेनिकट पिपिएलएबाट सचिव उम्मेदवार बनेका पुष्पराज बास्तोलाले उम्मेदवारी फिर्ता लिएका छन् ।

दुई संगठनबीचको समझदारी अनुसार माओवादीले सचिव र २ सदस्य पाएको छ । बाँकी पदमा एमालेका उम्मेदवार छन् ।

त्यस्तै कांग्रेसनिकट डिएलए र नेकपा एसनिकट एसपिएलएबीच पनि चुनावी गठबन्धन भएको छ । उक्त गठबन्धनबाट अध्यक्षमा बरिष्ठ अधिवक्ता मेघराज पोखरेल उम्मेदवार छन् भने उपाध्यक्षमा नेकपा एसनिकट एसपिएलएका अम्बर बहादुर राउत उम्मेदवार छन् ।

कांग्रेससँगको गठबन्धनमा नेकपा एसले सहसचिव र २ सदस्य समेत पाएको छ । वकिलहरुको यो गठबन्धनलाई आगामी फागुनमा हुने नेपाल बारको निर्वाचनको अभ्यास मानिएको छ । यसअघि पाटन उच्च बारमा पनि एमाले र माओवादीको गठन्धनविरुद्ध कांग्रेस र नेकपा एसले बनाएको गठबन्धन पराजित भएको थियो ।