महिलाहरुलाई विभिन्न प्रलोभनमा पारेर शारीरिक शोषण र ठगी गर्ने होमबहादुर पक्राउ

काठमाडौं । महिलाहरुलाई विभिन्न प्रलोभनमा पारी आर्थिक तथा शारीरिक शोषण गर्ने व्यक्तिलाई प्रहरीले नियन्त्रणमा लिएको छ ।

पीडित महिलाहरुको जाहेरीका आधारमा रामेछाप जिल्लाको दोरम्बा गाउँपालिका- ६ घर भई भक्तपुरको चागुनारायण बस्ने ३४ वर्षीय होमबहादुर मगरलाई काठमाडौं उपत्यका अपराध अनुसन्धान कार्यालय, टेकुले पक्राउ गरेको हो ।

उनी साजन मगरका नाममा सामाजिक सन्जालमा सक्रिय छन् । उनले कसैलाई आफ्नो डिपेन्डेन्ट बनाई कोरिया लैजान्छु भन्ने, कसैलाई सहुलियतमा सामान खरिद गर्नेजस्ता बहानामा आर्थिक र शारीरिक शोषण गर्ने गरेको अनुसन्धान कार्यालयका प्रवक्ता एसपी काजीकुमार आचार्यले बताए ।

उनका विरुद्ध जाहेरी दिने मगर समुदायकी एक महिलालाई फेसबुक र ह्वाट्सयापमार्फत सम्पर्क गरी कोरिया पठाउने नाममा २१ लाख रुपैयाँ ठगी गरेको उल्लेख छ ।

अर्की एक जाहेरवाली महिलालाई आइफोन दिने नाममा दुई लाख रुपैयाँ ठगी गरेको उल्लेख छ । यसबाहेक वैदेशिक रोजगारी तथा विभिन्न प्रलोभनमा पारी महिलाहरुलाई शारीरिक शोषणका मौखिक उजुरी पनि रहेको प्रहरीले जनाएको छ ।