खैरो हिरोइनसहित हेटौंडाबाट ७ जना पक्राउ

हेटौंडा । मकवानपुर प्रहरीले लागू औषध खैरो हिरोइनसहित सात जनालाई पक्राउ गरेको छ ।

प्रहरीले छुट्टाछुट्टै दुई स्थानबाट सात व्यक्तिलाई पक्राउ गरेको हो । प्रहरीले ४ ग्राम खैरो हेरोइनसहित हेटौँडा–२, पुरानो मकवानपुररोडस्थित शिशिर राजथलाको घरबाट ३१ वर्षीय शिशिर राजथला, ३० वर्षीय निरन श्रेष्ठ, ३५ वर्षीय सुदिप भुर्तेल, हेटौँडा–४ का ३० वर्षीय असिम कुमार बर्तौला र हेटौँडा–१ का ३० वर्षीय ओम साहलाई पक्राउ गरिएको जनाएको छ ।

यस्तै हेटौँडा–१७, हटिया दाबिलेबाट २ ग्राम ५४० मिलिग्राम खैरो हेरोइनसहित विदन कुमार भुजेल र बारा जिल्लाको विश्रामपुर गाउँपालिका–८, नकाटुवा टोलका २१ वर्षीय शेख आजादलाई पक्राउ गरिएको प्रहरीले जनाएको छ ।

उनिहरुलाई म्याद थप गरि थप अनुसन्धान जारी राखेको प्रहरीको भनाई छ ।