साका घाइते हुँदा आर्सनललाई समस्या

काठमाडौं। आर्सनल स्टार बुकायो साका ह्यामस्ट्रिङको चोटको कारण कम्तिमा दुई महिना मैदान बाहिर हुने भएपछि इङ्लिस क्लब आर्सनल समस्यामा परेको छ ।

आर्सनलका विंगर साका कम्तिमा दुई महिना मैदानबाहिर रहने आर्सनलका मुख्य प्रशिक्षक मिकेल आर्टेटाले बताएपछि आर्सनलका फ्यान निरास भएका हुन् ।

गत साता क्रिस्टल प्यालेसविरुद्ध ५-१ को जित निकाल्दा साकाको ह्यामस्ट्रिङमा चोट लागेको थियो ।

अर्टेटाले भने, ‘उनको शल्यक्रिया भएको छ र सबै कुरा सही हुँदैछ । म यकिनका साथ भन्न सक्दिन साका कहिले मैदान फर्किने छन् । तर उनी कम्तिमा पनि दुई महिना मैदान बाहिर रहनेछन् ।’

हाल इंग्लिस प्रिमियर लिग (इपिएल)मा आर्सनल दोस्राे स्थानमा छ । साकाको प्रेरणादायी प्रदर्शनले आर्सनल पछिल्लो समय लयमा आएको थियो । अब उसले कम्तिमा दुई महिना साकाको अभावमा खेल खेल्नुपर्ने भएको छ ।