माधव नेपालसँग वामदेवका २ शर्त, वार्ता निष्कर्षविहीन (भिडिओ)

काठमाडौं । पार्टी एकताको विषयमा एकीकृत समाजवादीका अध्यक्ष माधवकुमार नेपाल र वामपन्थी नेता वामदेव गौतमबीच सोमबार भएको कुराकानी निचोडमा पुगेन । आलोकनगरस्थित एकीकृत समाजवादीको पार्टी कार्यालयमा दुई नेताबीच एक घण्टा छलफल भएको थियो ।

छलफलबाट बाहिरिएपछि नेता गौतमलाई नेपाल प्रेसले सोध्यो, ‘समाजावादीमा कहिले जाने हुनुभयो ?’ उनले भने, ‘टुंगो लागेको छैन, अहिल्यै भन्न सकिन्नँ ।’

गौतमका अनुसार, प्रत्यक्ष निर्वाचित राष्ट्रपति हुनुपर्ने विषयमा नेपाल सहमत भएनन् । तर, आफ्नो धारणालाई खास खास समयमा राख्ने अनुमति दिएमा आफू उक्त पार्टीमा जानसक्ने बताए ।

‘यसबारेमा उहाँले अरु पाँच-सात जना साथीहरूसँग सल्लाह गर्छु भन्नुभयो’, उनले भने । समय समयमा प्रत्यक्ष निर्वाचित राष्ट्रपतिको कुरा उठाउन चाहँदा पनि नेपालले स्पष्ट जवाफ नदिएका कारण पार्टी प्रवेश वा एकताबारे अहिल्यै आफूले केही भन्न नसक्ने उनको भनाइ थियो ।

‘यदि बोल्ने कुरामा प्रतिबन्ध लगाइए म त्यो पार्टीमा जाने छैन, मैले माधव कमरेडलाई सकेसम्म बुझाउन खोजेँ, कति बुझ्नुभयो, थाहा छैन’, उनले भने ।

सोमबारको छलफलमा गौतमले सम्पूर्ण केन्द्रीय सदस्य पूर्णकालीन हुनुपर्ने, पूर्णकालीन हुन तयार नहुनेलाई केन्द्रीय कमिटीमा राख्न नहुने धारणा राखेको बताए ।

‘विचारमा गतिशीलताले पार्टी निर्माण हुन्छ’, उनले भने, ‘ विचार भएन, गतिशीलता पनि भएन भने पार्टी निर्माण हुन गाह्रो हुन्छ ।’

आफूले उठाएका कुरामा नेपालले ठोस ढंगले जवाफ नदिएको र आफ्ना सहकर्मीसँग छलफल गर्ने भनेको गौतमले बताए ।

‘त्यसपछि उहाँले सँगै बसेर छलफल गरौं पनि भन्नुभएको छ, कुराकानीको क्रम जारी रहन्छ, अहिल्यै मिलिसकेको छैन’, गौतमले बताए ।