बाढी पहिरोको बीमा दाबी भुक्तानीमा ढिलाइ

काठमाडौं । गत असोज दोस्रो साता आएको बाढी पहिराेले पुर्‍याएको क्षतिको बीमा दाबी भुक्तानीमा ढिलाइ भएको पाइएको छ । हालसम्म बाढी पहिरोको कारण बीमा कम्पनीमा १२ अर्ब ८८ करोड ९३ लाख रुपैयाँभन्दा बढीको दाबी परेको छ, तर भुक्तानी भने एक अर्ब ५२ करोड १८ लाख रुपैयाँ बराबरको मात्रै भएको छ ।

नेपाल बीमा प्राधिकरणका अनुसार यही पुस ११ गतेसम्म १८ वटा बीमा कम्पनीमा तीन हजार ६७६ जनाले दाबी पेश गरेका थिए । जसमा एक हजार ७२० जनाले मात्रै दाबी भुक्तानी पाएका छन् ।

सबैभन्दा बढी दाबी भुक्तानी शिखर इन्स्योरेन्सले गरेको छ । पुस ११ गतेसम्म यस कम्पनीले २४७ जनालाई ३० करोड ३५ लाख १९ हजार भुक्तानी गरेको छ । यस अवधिमा शिखरमा ५११ जनाले दुई अर्ब ६३ करोड एक लाख रुपैयाँको दाबी पेश गरेका थिए ।

त्यस्तै दि ओरियन्टल इन्स्योरेन्स कम्पनी लिमिटेडमा १८३ जनाले एक अर्ब ३७ करोड ६१ लाख रुपैयाँ बराबरको दाबी पेश गरेका थिए, तर हालसम्म ५ करोड ३ लाख रुपैयाँ बराबरको मात्रै भुक्तानी भएको छ । यो भुक्तानी १४७ जनाले मात्रै पाएका हुन् ।

यसैगरी यस अवधिमा सगरमाथा लुम्बिनी इन्स्योरेन्स कम्पनी लिमिटेडले १ अर्ब ३५ करोड ७८ लाख दाबी परेकोमा २० करोड ४३ लाख रुपैयाँ बराबरको भुक्तानी भएको छ । यसका साथै यस अवधिमा शिखर इन्स्योरेन्सले ३१ करोड ३८ लाख बराबरको भुक्तानी भएको बीमा प्राधिकरणले जनाएको छ ।