कस्तो हो एलिट कपमा खेल्न लागेको डे क्रिकेट ?

काठमाडौं । नेपाल क्रिकेट सङ्घ (क्यान) को आयोजनामा आउँदो सातादेखि जय ट्रफी एलिट कप डे क्रिकेट प्रतियोगिता हुँदै छ । क्यानका पूर्वअध्यक्ष जयकुमार नाथ शाहको सम्झनामा पुस २१ गतेदेखि माघ ३ गतेसम्म जनकपुर र पर्सामा उक्त प्रतियोगिता हुन लागेको हो । जयले ४ दशक क्यानको नेतृत्व गरेका थिए ।

पछिल्लो समय एक दिवसीय र टी-२० आई राम्रो प्रदर्शन गरिरहेका नेपाली खेलाडीले लङ फर्म क्रिकेट भने खासै खेल्ने पाएका छैन । नेपालले पछिल्लो पटक सन् २०१९ मा डे क्रिकेट खेलेको थियो । घरेलु मैदानमा खेलेको एक मात्र खेलमा नेपाल मेरिलिबोन क्रिकेट क्लब (एमसीसी) सँग २०८ रनले पराजित भएको थियो । त्यसयता नेपालमा कुनै पनि डे क्रिकेट भएको छैन । घरेलु क्रिकेटमा भने हालसम्म कुनै पनि डे क्रिकेट हुन सकेको थिएन ।

नेपालको घरेलु क्रिकेटमा पहिलो पटक नेपालले डे क्रिकेट खेल्न लागेको हो । फाइनल खेल तीन दिवसीय हुनेछ भने बाँकी खेल दुई दिवसीय हुनेछ । क्रिकेटको मेरुदण्डमा रूपमा रहेको लङ फर्मको क्रिकेट गर्न लागिएको क्यानका प्रवक्ता छुम्बी लामाले जानकारी दिए ।

प्रतियोगितामा गत फेब्रुअरीमा भएको प्रधानमन्त्री कप पुरुष एक दिवसीय क्रिकेट प्रतियोगितामा शीर्ष ४ मा परेका टोली सहभागी हुनेछन् । नेपाल पुलिस क्लबसहित त्रिभुवन आर्मी क्लब, मधेस प्रदेश र बागमती प्रदेशले डे क्रिकेटमा सहभागिता जनाउने छन् । प्रतियोगितामा सबै टोलीले एक अर्कासँग एक-एक खेल खेल्नेछन् । त्यसपछि शीर्ष शीर्ष दुईमा रहने टोली फाइनल खेल्नेछन् ।

प्रतियोगिताको पहिलो खेल जनकपुरमा पुस २१ र २२ गते मधेश प्रदेश र बागमती प्रदेशबीच हुनेछ । सोही समयमा पर्सामा नेपाल पुलिस र त्रिभुवन आर्मीबीच प्रतिस्पर्धा हुनेछ ।

पुस २४ र २५ गते जनकपुरमा त्रिभुवन आर्मी र बागमतीबीच खेल हुनेछ । यस्तै सोही समयमा पर्सामा मधेश र नेपाल पुलिसबीच प्रतिस्पर्धा हुनेछ । पुस २७ र २८ गते जनकपुरमा पुलिस र बागमती तथा पर्सामा त्रिभुवन आर्मी र मधेशबीच खेल हुनेछ । फाइनल खेल माघ १ देखि ३ गतेसम्म पर्सामा हुनेछ । सम्पूर्ण खेल बिहान साढे ९ बजेबाट सुरू हुनेछ ।

डे क्रिकेटले क्रिकेट विकाससँगै काठमाडौं बाहिरको संरचना विकासमा टेवा पुग्ने क्यानका प्रवक्ता लामाले बताए ।

‘क्रिकेटको मेरुदण्डको रूपमा रहेको डे क्रिकेटलाई नेपाली क्रिकेटमा पनि सुरुआत गर्दै छौँ । घरेलु क्रिकेटमा अहिलेसम्म भएको छैन । नेपालले मेरिलिबोन क्रिकेट क्लबसँग खेलेको पनि ५ वर्ष बढी भइसक्यो,’ उनले भने, ‘डे क्रिकेट खेलाडीका लागि पनि एकदमै महत्त्वपूर्ण हुनेछ । काठमाडौंबाहिर प्रतियोगिता गर्दा संरचनाको विकास हुन्छ ।’

रोहितसहित दीपेन्द्र, अनिलले गुमाउनेछन् एलिट कप ।

राष्ट्रिय क्रिकेट टोलीका कप्तान रोहित पौडेलसहित अलराउन्डर दीपेन्द्रसिंह ऐरी, अनिलकुमार शाह, आसिफ शेखसहितका खेलाडीले एलिट कप गुमाउने छन् । रोहित, आसिफले गत फेब्रुअरीमा भएको प्रधानमन्त्री सशस्त्र प्रहरी बल (एपीएफ) बाट खेलेका थिए । एपीएफ शीर्ष चारमा पर्न नसक्दा रोहित, आसिफसहितका खेलाडीले एलिट कप गुमाउनेछन् । शीर्ष चारमा परेका टोलीले एलिट कप खेल्नेछन् ।

प्रधानमन्त्री कपको उपाधि जितेका दीपेन्द्रले अन्तर्राष्ट्रिय लिग टी-२० (आईएलटी) खेल्ने युएई जानुपर्ने भएकाले उनले एलिट कप गुमाउनेछन् । उनी आईटीएल गल्फ जायन्ट्सबाट खेल्दै छन् ।

नेपाल प्रिमियर लिग (एनपीएल) लाई उपाधि जिताएका मधेशका कप्तान अनिलकुमार शाहले पनि एनपीएल गुमाउनेछन् । एनपीएलका क्रममा घाइते भएसँगै उनले प्लेअफका खेल गुमाएका थिए । तत्कालै रिकभर हुने नदेखेपछि मधेशले अनिललाई बाहिर राख्दै एलिट कप खेल्ने टोलीको घोषणा गरेको हो ।

यस्तै बागमती, मधेश, त्रिभुवन आर्मी र पुलिस क्लबबाहेक अन्य टोलीबाट प्रधानमन्त्री कप खेलेका खेलाडीले पनि एलिट कप गुमाउने छन् ।