भारतीय टेस्ट टीममा कप्तान रोहित शर्माकै स्थान खतरामा ! गम्भीरले गरे लाक्षणिक टिप्पणी

काठमाडौं । भारतीय क्रिकेट कप्तान रोहित शर्माले अष्ट्रेलियाविरुद्धको पाचौं टेस्टमा खेल्ने अनिश्चित बनेको छ । अत्यन्तै खराब फर्मका कारण प्लेइङ ११ मा उनको स्थान असुरक्षित बनेको हो ।

भारतले भोली अष्ट्रेलियाविरुद्ध पाचौं तथा अन्तिम टेस्ट खेल्दैछ । श्रृंखलामा २-१ ले पछि परेको भारतलाई बोर्डर गवास्कर ट्रफी नगुमाउन तथा टेस्ट च्याम्पियनसीप फाइनलको सम्भावना जिवित राख्न निश्चित जित चाहिन्छ । तर, टीम अहिले उच्च मनोबलमा छैन । सिनियर दुई खेलाडी रोहित शर्मा र बिराट कोहलीको खराब फर्म प्रशिक्षक गौतम गम्भीरका लागि टाउको दुखाइ बनिरहेको छ ।

अन्तिम खेलअघि आयोजित प्रेस मिटमा कप्तान रोहित उपस्थित भएनन् । पत्रकारहरूलाई यसबारे प्रष्टीकरण दिने क्रममा प्रशिक्षक गौतम गम्भीरले ‘आफू नै पर्याप्त’ भएको बताए ।

रोहित किन आएनन् भन्ने प्रश्नमा उनले जवाफ दिए, ‘हेड कोच यहाँ छ । यही नै पर्याप्त हो ।’

पत्रकारले सोधे, ‘के रोहित ठिक छन् ?’

गम्भीरले जवाफ दिए, ‘उनी पूर्णरूपमा ठिक छन् ।’

पत्रकारले फेरि सोधे, ‘रोहितले यो टेस्ट खेल्छन् ?’

गम्भीरले ‘यस’ वा ‘नो’ मा जवाफ दिएनन् ।

उनले भने, ‘हामी विकेटको अवस्था हेरेर भोलि निर्णय लिने छौं ।’

सामान्यतया क्याप्टेन सकुशल भएको अवस्थामा प्लेइङ ११ मा उनको स्थानमाथि कुनै शंका हुँदैन । बरु टिमका अन्य खेलाडीको छनोट प्रशिक्षक र कप्तानले मिलेर गर्ने गर्छन् । तर, गम्भीरको उक्त जवाफबाट भने रोहितले प्लेइङ ११ मै स्थान गुमाउन सक्ने आशंका गरिएको छ । उनको स्थानमा शुभमन गिललाई खेलाइन सक्ने अड्कलवाजी भइरहेका छन् ।

बिहीबारको ट्रेनिङ सेसनमा रोहित निकै ढिला आएका थिए । जसप्रित बुमराहको नेतृत्वमा टिम ट्रेनिङमा उत्रिएको थियो । रोहित आउँदा एक घन्टाको अभ्यास भइसकेको थियो । शुभमन गिलले पहिलो सेटमा रहेर अभ्यास गरिरहेका थिए । किटबिनै मैदानमा आएका रोहितले खासै अभ्यास पनि गरेनन् ।

श्रृंखलाको पहिलो टेस्टमा चोटका कारण रोहित अनुपस्थित थिए र जसप्रित बुमराहले कप्तानी गरेका थिए । उक्त टेस्ट भारतले जितेको थियो । दोस्रो टेस्टमा रोहितले कप्तानी गरे । तर, तीन टेस्टमा उनको व्यक्तिगत प्रदर्शन विर्सनलायक रहेछे । उनले श्रृंखलामा ६.२ को दयनीय औसतमा रन बनाइरहेका छन् । उनले पाँच पटक ब्याटिङ गर्दा एकपटक मात्रै दोहोरो अंकमा रन बटुल्न सके । रोहितले बनाएको सर्वाधिक ठूलो स्कोर हो १० रन ।

यो श्रृंखलाभन्दा अगाडिदेखि नै रोहित खराब फर्मबाट गुज्रिरहेका थिए । पछिल्ला ९ टेस्टमा उनको औसत १०.९३ मात्र छ ।

त्यसो त अर्का दिग्गज ब्याट्सम्यान बिराट कोहलीले पनि अष्ट्रेलियामा कुनै चमत्कार देखाउन सकेका छैनन् । पहिलो टेस्टको दोस्रो इनिङमा सतक हाने पनि अन्य ६ इनिङमा उनको ब्याट पूर्णरुपमा शान्त रह्यो । चौंथो टेस्टका दुई इनिङमा उनी क्रमशः ३६ र ५ रन बनाएर आउट भएका थिए ।

टीमका सबैभन्दा अनुभवि र भरपर्दा ब्याटरको खराब फर्म भारतलाई महंगो परिरहेको छ । फ्यानहरुले दुवै खेलाडीलाई सन्न्यासको दवाव दिन थालेका छन् । ३६ वर्षिय बिराट र ३७ वर्षिय रोहितले यसै वर्ष टी २० अन्तर्राष्ट्रियबाट सन्न्यास लिइसकेका छन् । अब टेस्ट टीममा पनि उनीहरूले युवा खेलाडीहरूलाई ठाउँ खाली गरिदिनुपर्ने भारतीय फ्यानहरट्ठको माग छ ।