युट्युबर मिस्टर बिस्टले गरे इन्गेजमेन्ट, को हुन् उनकी हुनेवाली पत्नी ?

वासिङ्टन डीसी । विश्वकै नम्बर एक युट्युबरका रूपमा परिचित मिस्टर बिस्ट (जेम्स डोनाल्डसन) विवाहबन्धनमा बाँधिने भएका छन् । उनले आफ्नी प्रेमिका थिया बुयसेनसँग हिजो इन्गेजमेन्ट गरे ।

युट्युबमा सर्वाधिक सब्सक्राइबर्स भएका २६ वर्षीय बिस्टले गत ‘क्रिसमस डे’ मा प्रेमिकालाई प्रपोज गरेका थिए । नयाँ वर्ष २०२५ मा उनले आफूहरू ‘ईंगेज्ड’ भएको घोषणा गरे ।

मिस्टर बिस्टले प्रेमिकासँगको ईंगेजमेन्टका तस्बिरहरू आफ्नो इन्स्टाग्राममा पोस्ट गरेका छन् । एउटा तस्बिरमा उनले आफ्नो लिभिङ रुममा एउटा घुँडा टेकेर बुयसेनलाई औँठी लगाइरहेको छन् । अन्य तस्बिरमा परिवारका सदस्यहरू पनि देखिएका छन् ।

२७ वर्षीया बुयसेनले पनि भिडिओ क्लिप बनाएर ईंगेजमेन्टबारे पोस्ट गरेकी छन् । उनले आफ्नो हिराको औँठी पनि देखाएकी छन् ।

एउटा अन्तरवार्तामा यो जोडीले बताए अनुसार बुयसेनको परिवार साउथ अफ्रिकाबाट क्रिसमस उनीहरूसँग क्रिसमस मनाउनका लागि नर्थ क्यारोलिना आएको थियो । त्यही अवसरमा इन्गेजमेन्ट भएको हो ।

यो जोडीले विवाह कहिले गर्ने भनेर बताएका छैनन् । तर, तडकभडकपूर्ण भन्दा पनि सानो समारोहमा सुन्दर तरिकाले विवाह गर्ने उनीहरूको भनाइ छ ।

मिस्टर बिस्ट सन् २०२२ मा साउथ अफ्रिका जाँदा बुयसेनसँग उनको भेट भएको थियो । उनीहरूले एक साझा साथीको घरमा सँगै डिनर खाएका थिए । तत्कालै आफूहरू एक–अर्काबाट प्रभावित भएको उनीहरूको भनाइ छ ।

उनीहरूले २०२२ को अप्रिलमा किड्स च्वाइस अवार्डमा एक साथ रेड कार्पेट डेब्यू गरेका थिए । मिस्टर बिस्ट सन् २०२३ मा नै प्रपोज गर्न चाहन्थे तर कानूनमा ब्याचलर्स पढेकी बुयसेनले मास्टर्स नसिध्याउँदासम्म पर्खिने निर्णय गरे ।

बुयसेनले गत नोभेम्बरमा युनिभर्सिटीअफ एडिनबर्गबाट ह्यूमन कग्निटिभ न्यूरोसाइकोलोजीमा मास्टर्स सकेकी थिइन् । उनी युट्युबमा पनि सक्रिय छिन् । थियाबिस्टी नामक युट्युब च्यानलमा उनका ४० हजार जति सब्सक्राइबर्स छन् । जबकि मिस्टर बिस्टको युट्युब च्यानलमा ३४ करोडभन्दा बढी फलोअर्स छन् ।