गगनको प्रस्तावमा शिशिरको राय- आयोग बनाएर भ्रष्टाचारको सबै काण्ड छानबिन गर्नुपर्छ

काठमाडौं । राष्ट्रिय स्वतन्त्र पार्टीका सांसद शिशिर खनालले भ्रष्टाचारको सबै काण्ड छानबिन गर्नुपर्ने बताएका छन् ।

नेपाली कांग्रेसका महामन्त्री गगन थापाले हिजो बसेको राज्य व्यवस्था तथा सुशासन समितिको बैठकमा भ्रष्टाचारका कुन-कुन फाइल खोल्ने भनेर तीन पूर्वप्रधानमन्त्रीको उपस्थितिमा टुंगो लगाउनुपर्ने बताएका थिए ।

त्यही प्रसंगलाई लक्षित गर्दै कुन काण्ड छानबिन गर्ने भनेर ठूला पार्टी र ठूला नेताको सहमति भन्दा पनि सबै काण्डको छानबिन गर्ने गरी उच्चस्तरीय आयोग बनाउनुपर्ने प्रस्ताव गरे ।

उनले भनेका छन्, ‘२०६३ सालपछि बाहिर आएका १ अर्बभन्दा ठूला भ्रष्टाचारसँग जोडिएका ३१ वटा काण्डमार्फत २२३ अर्बभन्दा बढी भ्रष्टाचार भएको हुन सक्छ भनेर यो सूचीले भन्छ । तर, यो सूचीमा ७० करोड लगायतका काण्ड छैनन् । र, पछिल्लो समय चर्चामा आएका अन्य काण्डहरू पनि छैनन् । त्यसैले कुन काण्ड छानबिन गर्ने भनेर ठूला पार्टी र ठूला नेताको सहमति हैन, यी सबै काण्डको छानबिन गर्ने गरी उच्चस्तरीय आयोग बनाऔँ ।’

उनले आयोगलाई समयसीमा तोकेर स्वतन्त्रतापूर्वक काम गर्नुपर्ने बताए ।

खनालले फेसबुकमा लेखेका छन्, ‘आफ्नो मान्छे नराखौं, सक्षम राखौं । समयसीमा तोकेर स्वतन्त्रतापूर्वक काम गर्न दिऔं । दोषीलाई कारवाही गरौं । हाम्रो पूर्ण समर्थन रहनेछ ।’