अष्ट्रेलियाविरुद्ध प्लेइङ ११ मै परेनन् भारतीय कप्तान रोहित, टेस्ट क्रिकेटबाट सन्न्यास लिने अनुमान

काठमाडौं । अष्ट्रेलियाविरुद्धको पाँचौं तथा अन्तिम टेस्टमा भारतीय कप्तान रोहित शर्मा नै प्लेइङ ११ बाट फालिएका छन् । उनको ठाउँमा जसप्रित बुमराहलाई टीमको कप्तानी दिइएको छ ।

५ खेलको श्रृंखलामा भारत २-१ ले पछाडि छ । बोर्डर गवास्कर ट्रफी नगुमाउनका लागि अन्तिम टेस्ट जित्नैपर्ने दबाबमा छ भारत । तर, टोलीका सिनियर ब्याटरहरू नै राम्रो फर्ममा छैनन् । श्रृंखलामा कप्तान रोहित शर्मा र विराट कोहलीको प्रदर्शन निराशाजनक छ ।

५ इनिङमा लगातार फ्लप भएका रोहितलाई अन्तिम टेस्टमा हटाइने संकेत प्रशिक्षक गौतम गम्भीरले अगाडि नै गरेका थिए । यद्यपि, कुनै पनि औपचारिक जानकारी दिइएको थिएन । आज टसमा रोहितको स्थानमा बुमराह आए । कप्तान परिवर्तनबारे उनलाई केही सोधिएन । तर, बुमराह आफैंले मुख खोले । उनले रोहितले ‘रेस्ट लिएको’ दाबी गरे ।

‘हाम्रो कप्तानले नेतृत्व गुण देखाउँदै यो म्याचमा रेस्ट लिनुभएको छ । यसले टिमभित्रको एकता दर्शाउँछ,’ उनले भने ।

तर, भारतका लागि अत्यन्त महत्वपूर्ण म्याचमा रोहितले रेस्ट लिनुपर्ने कुनै पनि कारण थिएन । प्रशिक्षक गौतमले खराब फर्मकै कारण उनलाई प्लेइङ ११ बाट हटाएको सञ्चारमाध्यमहरुले जनाएका छन् । रोहितको स्थानमा शुभमन गिललाई खेलाइएको छ । तेस्रो नम्बरमा खेलेका उनले २० रन बनाएर आउट भए ।

भारतीय पूर्वक्रिकेटर तथा कमेन्टेटर सुनील गवास्करले रोहितको टेस्ट करिअर अन्त्य भइसकेको हुन सक्ने बताए ।

पहिलो दिनको लन्च ब्रेकपछि उनले भने, ‘मलाई लाग्छ, यदि भारत टेस्ट च्याम्पियनसीपको फाइनलमा पुगेन भने मेलबर्न टेस्ट नै रोहित शर्माको अन्तिम म्याच हुनेछ ।’

भारतले टेस्ट च्याम्पियनसीप साइकलको अर्को श्रृंखला ईंग्ल्यान्डविरुद्ध खेल्नेछ । छनोटकर्ताहरूले २०२७ मा हुने फाइनलमा उपलब्ध हुनसक्ने खेलाडी छनोट गर्ने भएकाले रोहितको सम्भावना नरहने गवास्करको दाबी छ ।

उनले थपे, ‘सम्भवतः हामीले रोहित शर्माको अन्तिम टेस्ट म्याच हेरिसक्यौं ।’

अर्का भारतीय कमेन्टेटर रवि शास्त्रीको भनाइ पनि उस्तै छ ।

उनले कमेन्ट्रीकै क्रममा भने, ‘यदि अब भारतले घरेलु सिरिज खेल्ने थियो भने रोहितले निरन्तरता दिन सक्थे । त्यो नभएकाले अब रोहितले यो टेस्टपछि सन्न्यास घोषणा गर्न सक्छन् ।’

भारतसँग प्रशस्त युवा खेलाडीहरु भएकाले रोहितले ठाउँ खाली गर्नुपर्ने शास्त्रीले बताएका छन् ।