मदन भण्डारी गोल्डकप इन्डो-नेपाल भलिबल प्रतियोगिता : गल्कोटलाई हराउँदै एपीएफको पहिलो जित (भिडिओ)

रुपन्देही । विभागीय टीम एपिएफले गल्कोट भलिबल क्लबलाई हराउँदै आफ्नो पहिलो जित दर्ता गराएको छ । बुधबारबाट बुटवलमा जारी मदन भण्डारी गोल्डकप इन्डो–नेपाल रनिङ शिल्ड पुरुष भलिबल च्याम्पियनसिप–२०८१ मा एपिएफले शुक्रवार करिब ३ घण्टाको समय खर्चेर ३–२ को कडा प्रतिस्पर्धामा कठिन जित निकालेको हो ।

बिहीबार चिसो र हुस्सुसंगै शीत परेपछि स्थगित एपिएफ र गल्कोटबिचको खेल शुक्रवार पुनः खेलाइएको थियो । बिहीबार चौथो सेटमा पुगेर खेल स्थगित भएको थियो ।

शुक्रवार पहिलो सेट २५–१५ मा सहजै जितेको एपिएफले दोस्रो सेट २५–२२ पनि आफ्नो पक्षमा पार्यो । एपिएफको स्पाइकरको जोडी सुरेन्द्र केसी र सरोज वर्देवाले टोलीलाई कठिन समयमा जित दिलाएका थिए । तर गल्कोटका मिन सुनार, जीवन सुनार, आलोक सुनार इरानियन खेलाडी मोविन सिरीको मेहनतले तेस्रो र चौथो सेट जित्यो। गल्कोटले तेस्रो सेट २५–२२ तथा चौथो सेट ३३–३१ अंकमा जितेको थियो ।

निर्णायक अन्तिम तथा पाचौं सेटको लाइन्स जज र रेफ्रीको निर्णयलाई लिएर पटकपटक विवाद हुँदा खेल करिब आधा घण्टा रोकिएको थियो । तनावपूर्ण त्यो सेट एपिएफले २०–१८ ले जित्यो । यसैगरी यसअघि शुक्रबार भएको पहिलो खेलमा आयोजक मदन भण्डारी स्पोर्टस एकेडेमी विजयी भएको थियो ।

एकेडेमीले आफ्नो दोस्रो खेलमा शुक्रवार रुकुम पश्चिम भलिबल प्रशिक्षण केन्द्रलाई ३–० को सोझो सेटमा पराजित गरेको हो । बुटवल उपमहानगरपालिका वडा नं. १० स्थित रामनगर कोर्टमा जारी प्रतियोगिताको तेस्रो दिनको पहिलो खेलमा एकेडेमीले रुकुममाथि सहज जित निकालेको हो । एकेडेमीले पहिलो सेट २५–१९, दोस्रो सेट २५–१४ र तेस्रो सेट २५–२३ अंकमाले थियो । तेस्रो सेटबाहेक एकेडेमीले सहजै जितेको थियो ।

मदन भण्डारी स्पोटर्स एकेडेमी प्रतियोगिताको उद्घाटन खेलमा नेपाल पुलिस क्लबसंग ३–१ मा पराजित भएको थियो ।

रुकुम मणिमुकुन्द भलिवल क्लबसँग ३–० को सोझो सेटमा पराजित भएको थियो । एकेडेमीले छनोट चरणको अन्तिम प्रतिस्पर्धा आइतवार मणिमुकुन्दसंग गर्नेछ । दुवै खेल गुमाएको रुकुमपश्चिमले सोमवार पुलिसको सामना गर्नेछ । समूह एमा रहेको पुलिस, मणिमुकुन्दले समान खेले जितेका छन् ।

रुकुम पश्चिमले दुबै खेलगुमाएको छ। मदन भण्डारी एकेडेमी १ जित र १ हार बेहोरेको छ । प्रतियोगिताको विजेताले ७ लाख ५० हजार, दोस्रो टोलीले ३ लाख ५० हजार, तेस्रोले १ लाख ७५ हजार र चौथो टोलीले १लाख रुपैयाँ पाउने छ । शनिवार ३ वटा खेल हुनेछन् ।

पहिलो खेल एपिएफ र भारतको गुजरात प्रदेश भलिबल एसोसिएसन, दोस्रो खेल मणिमुकुन्द र पुलिस तथा तेस्रो खेल त्रिभुवन आर्मी क्लब र गल्कोटबीच हुनेछ । पुस २४ गतेसम्म सञ्चालन भएको प्रतियोगितामा नेपाल र भारतका ८ टिमको सहभागिता छ ।