मदन भण्डारी गोल्डकप इन्डो-नेपाल भलिबल प्रतियोगिता : नेपाल पुलिस, त्रिभुवन आर्मी र गुजरात स्टेट विजयी

रुपन्देही । मदन भण्डारी गोल्डकप इन्डो-नेपाल रनिङ शिल्ड पुरुष भलिबल च्याम्पियनशिपको शनिबार भएको खेलमा विभागीय टीम नेपाल पुलिस क्लब र त्रिभुवन आर्मी क्लब तथा गुजरात स्टेटले जित निकाल्दा अर्को विभागीय टीम एपीएफ पराजित भएको छ ।

बुटवल- १० स्थित रामनगर खेल मैदानमा भएको पहिलो खेलमा पुलिसले मणिमुकुन्द भलिबल क्लबमाथि ३-१ को सेटको जित निकालेको हो । प्रतिस्पर्धात्मक खेलको पहिलो सेट पुलिसले २५-१५ अंकका साथ जित निकालेको थियो । दोस्रो सेट भने मणिमुकुन्दले २५-२० को अंकका साथ जित निकाल्दै बराबरीमा ल्यायो । त्यसपछि पुलिसले लगातार तेस्रो र चौथो सेट २५-२० र २५-१८ अंकका साथ जित निकाल्दै खेल आफ्नो पोल्टामा पारेको थियो ।

शनिबार नै भएको अर्को खेलमा भारतको गुजरातले विभागीय टीम एपीएफलाई ३-१ सेटले पराजित गरेको छ । एपीएफले पहिलो सेट २५-२१ अंकले जित निकाल्दै अग्रता लिए पनि त्यसपछि गुजरात खेलमा हाबी भयो । गुजरातले लगातार २५-१८, २५-१५ र २५-१८ अंकले जित निकाल्यो ।

यसैगरी तेस्रो खेलमा विभागीय टीम त्रिभुवन आर्मीले गल्याङ भलिबल क्लबलाई ३-० को सोझो सेटमा पराजित गरेको छ ।

पुस २४ गतेसम्म सञ्चालन हुने प्रतियोगितामा नेपाल र भारतका ८ टीमको सहभागिता रहेको छ । जसमा समूह ‘ए’ मा नेपाल पुलिस प्रहरी, मणिमुकुन्द भलिबल क्लब, रुकुम पश्चिम भलिबल प्रशिक्षण केन्द्र र मदन भण्डारी एकेडेमी रहेका छन् । समूह ‘बी’ मा नेपाल एपीएफ क्लब, नेपाल आर्मी, गल्कोट भलिबल क्लब र गुजरात प्रदेश भलिबल एसोसियसन भारत रहेका छन् ।

प्रतियोगिताको विजेताले सात लाख, दोस्रोले तीन लाख ५० हजार, तेस्रोले एक लाख ७५ हजार र चौथो हुने टीमले एक लाख रुपैयाँ पाउनेछ । उत्कृष्ट खेलाडीलाई २५ हजार तथा विधागततर्फ १० हजारका दरले पुरस्कृत गरिने आयोजक एकेडेमीकी सचिव अमृता अनमोलले जानकारी दिइन् ।